Хæцгæ низ коронавирус бирæ къуылымпыдзинæдтæ сæвзæрын кодта æхсæнадон царды. Бирæтæ æнæ куысты бынæттæй дæр баззадысты. Ацы уавæр фæзындис нæ республикæйыл дæр. Пандемийы размæ кæд Цæгат Ирыстоны æгуыст адæмы нымæц, зæгъæм, 40 проценты уыдис, уæд коронавирусы фæстæ ацы нымæцы процент сырæзыд.
Къуырцдзæвæнæй куыд ис рахизæн æмæ цы мадзæлттæ арæзт цæуы ацы фарста банывыл кæнынæн, уый тыххæй журналисттæн бæстон радзырдта Цæгат Ирыстоны Адæмæн куыст дæттыны комитеты, фæллойадон миграци æмæ куыстдæттæг организацитимæ, амалхъом адæймæгтимæ бастдзинад дарыны хайады сæргълæууæджы хæдивæг Хуыдзиаты Ацæмæз. Куыд радзырдта, афтæмæй комитет архайы, номхыгъды сæм чи ис, уыцы æгуыст адæмæн куыст ссарыны фæдыл хицæн амалхъом адæймæгтæ æмæ организацитимæ бастдзинад иудадзыг дарын æмæ сын кæмдæр цавæрдæр бæрæг бæлвырд хъуыддæгтæй баххуыс кæныныл.
— Пандемийы фæстиуджытæ аиуварс кæнынæн архайæм фæллойы базарад фæстæмæ банывылыл. Уый тыххæй кусæг фембæлдтытæ аразæм куыстдæттæг адæймæгтимæ. Ныхас кæнæм семæ куыстуаты æнтыстджын рæзтыл æмæ æгуыст адæмæн куысты бынæттæ аразыныл. Гæнæн æмæ амалæй сын ахуыртæ дæр кæнæм.
Абоны уавæрты, нæ службæ куыстдæттæг æмæ куыст агурæг адæймæгтæн сæ хæстæ фæрогдæр кодта. Сарæзтам сæрмагонд портал социалон хыз — инстаграмы — «Работа.соm», зæгъгæ, хицæн сайт. Ацы ран куыстдæттæг адæймæгтæн фадат ис сæхи хъусынгæнинаг ныффыссын, ома, куысты бынæттæ кæй ис, уый фæдыл, куыст агурæг адæймæгтæ та йæ фендзысты æмæ сæ куырдиæттæ электронон хуызы бадæтдзысты. Æппæт ацы лæггæдтæ дæр сты лæвар. Уымæй уæлдай, куыстдæтджытимæ ныхас кæнæм паддзахадон программæты архайыны фарстыл дæр. Ацы аз нæ республикæйы æххæстгонд цæуы амалхъом адæймæгтæн æххуыс кæныны мадзал. Куыстдæттæг адæймæгтæ райсдзысты æххуыс — 40 мин сомы, нæ центры номхыгъды чи ис, уыцы адæмæй куысты бынæттæ кæмæн радтой, уый тыххæй. Стæй, уæлдæр куыд загътон, социалон хызы чи бадæтта куырдиæттæ, уыцы амалхъомтæн, — фæнысан кодта Хуыдзиаты Ацæмæз.
Ахæм программæйы фæрцы ивгъуыд 2020 азы æххуыстæ æрцыд 50 амалхъом адæмæн, 700 адæймагæн та — куысты бынæттæ.
9 апрелы комитеты ацæудзæн æрвылазон ваканситы армукъа.
Саутæты Тамилæ
