Паддзахадон тырысайы бон Дзæуджыхъæуы администрацийæ уæлдай ма изæры авд сахатыл триколоры хуызтæ ссыгътой Мыхуыры хæдзары раз дæр.
— Махæн ацы хъуыддаг тынг ахсджиаг уыд, цæмæй æрмæст администрацийы нæ, фæлæ ма Мыхуыры хæдзары раз дæр сфæйлауой паддзахадон тырысайы хуызтæ. Ам сты газеттæ æмæ журналты редакциты кусджытæ æмæ типографийы минæвæрттæ. Мах æй æмбарæм: нæ паддзахадон тырыса у сæрибар æмæ бирæнацион иудзинады æвдисæн, уымæ гæсгæ ацы хъуыддаг у ноджы ахсджиагдæр. Мыхуыры хæдзары ахæм мадзал ныры онг нæ уыд, ацы аз æй скодтам фыццаг хатт, — загъта Мыхуыры хъуыддæгты комитеты сæрдары хæдивæг Гæбалты Мæдинæ.
— Ацы бæрæгбон у, тынг ахсджиаг. Абон иууылдæр Уæрæсейы паддзахад сахуырст триколоры хуызтæй. Уый дзурæг у, патриотизм æмæ Фыдыбæстæ уарзыныл кæй хъæуы архайын, уæлдайдæр фæсивæды ‘хсæн. Ацы триколоры хуызтæ кæй сты рæстдзинад, хæлардзинад, уæлахиз æмæ кæрæдзимбарынады æвдисæндартæ. Цæмæй ацы адæмон хæзнатæ бæрзонд æвæрд уой нæ фæсивæдмæ, нæ тырыса куыд бæрзонд æвæрд у, афтæ.
Ацы аз 1 сентябры Уæрæсейы скъолаты ахуыртæ райдайдзысты Уæрæсейы тырыса сисын æмæ паддзахадон гимнæй, — загъта журнал «Мах дуг»-ы сæйраг редактор Хетæгкаты Оксанæ.
Триколоры хуызтæ сыгъдысты цалдæр сахаты бæрц.
Цæгæраты Эльмирæ
