Знон Цæгат Ирыстоны кадджын уавæры байгом аэропорт «Дзæуджыхъæу”-ы авиабастдзинады ног терминал. 2020 азы декабры райдыдта йæ арæзтад æмæ абон уæлдæфон бæлццæттæн лæггад кæнынмæ у цæттæ. Ног бæстыхай дзуапп дæтты нырыккон домæнтæн. Зæрдæмæдзæугæ у йæ æддаг бакаст, райдзаст æмæ парахат сты дыууæ уæладзыджы дæр.
Æхсæз лифты, эскалатор, кусы дзы æдасдзинады æмæ уæлдæфы сыгъдæгдзинадмæ чи кæсы, ахæм системæтæ. Бæлццæтты удæнцойæн дзы ис аив æнхъæлмæкæсæн залтæ, чысыл хæрæндæттæ, дуканитæ.
Æппæт ацы ногдзинæдтæ фенынмæ æрбацыдысты РЦИ-Аланийы Сæргълæууæг Сергей Меняйло, республикæйы раздæры Сæргълæууæг Битарты Вячеслав, æндæр бæрнон кусджытæ.
Комкоммæ цæстуынгæ бастдзинады фæрцы кадджын мадзалы архайджытæн арфæ ракодта Уæрæсейы Федерацийы Президент Владимир Путин.
Бузныг загъта, ацы хорз æмæ хъæугæ хъуыддагыл чи бафыдæбон кодта, уыдонæн се ‘ппæтæн дæр.
Фæстæдæр аэропорт «Дзæуджыхъæу”-ы генералон директор Сергей Чалов уазджытимæ æрзылдис ног аэропорты бæстыхайыл. Бæрæгбон сфидыдта ирон музыкæ æмæ «Хонгæ» кафтæй. Уыцы бон паддзахадон хæрзиуджытæ радтой къорд адæймагæн. Майдан «Ирыстон Намысæн”-æй — схорзæхджын кодтой компани «Новапорт Холдинг»-ы генералон директор Роман Троценкойы, республикæйы Кады грамотæтæ радтой аэропорт «Дзæуджыхъæу»-ы техникон директор Сергей Бенц, проекты разамонæг Олег Гречишкин æмæ аэропорт «Минеральные Воды»-йы техникон директор Хъалæгаты Олегæн.
Журналистты фарстытæн дзуаппытæ дæтгæйæ, Сергей Меняйло загъта, рæстæгимæ æмдзу кæнын кæй хъæуы. — Бæлццæтты нымæц фылдæр кæны. Аразæм нырыккон фæндæгтæ, абон та гом кæнæм уæлдæфон дуæрттæ Ирыстонмæ. 1,5 милуан адæймагæн лæггад кæндзæн бастдзинады ног терминал. Уæрæсейы Президент нын бафæдзæхста, æмæ фæстæдæр скæндзыстæм уæлæмхасæн уадзæн пункт ацы аэропорты. Не’ стыр нысан у, цæмæй ног терминал куса æхсæвæй-бонæй, — загъта Сергей Меняйло.
— Æхсызгонæй цин кæнын ирыстойнæгтимæ. Туризмы райрæзты программæ æххæст кæнгæйæ ма дарддæр кусдзыстæм. Ирон адæм хъуыстгонд сты сæ уазæгуарзондзинадæй. Иу хатт чи фена уæ рæсугъд хæхтæ, диссаджы æхсæрдзæнтæ, уый, æнæмæнгæй, ссæудзæн дыккаг, æртыккаг хатт, — загъта Роман Троценко.
Гугкаты Жаннæ
Къамтæ систа Хъвйырты Дианæ
