РЦИ-Аланийы Сæргълæууæг Сергей Меняйло бафыста æнæтæхæг уæлдæфон аппараттæй республикæйы фæзуаты пайда нæ кæныны тыххæй Указ. Гæххæтт фæзынд ног азы размæ, ныр йæ тыхы бацыд.
Республикæйы Сæргълæууæджы Указæй 2022 азы, 29 декабрæй, Цæгат Ирыстоны пайда кæнæн нæ уыдзæн æнæтæхæг граждайнаг уæлдæфон транспортæй. Уырдæм нæ хауынц, федералон, республикон æмæ муниципалон паддзахадон оргæнтæ цы уæлдæфон наутæй пайда кæнынц, уыдон. Паддзахадон хъахъхъæнæн фæдзæхст æххæстгæнæг уæлдæфон наутæм дæр Указ бар нæ дары, артаджы-энергетикон комплексы организацитæм дæр афтæ.
Указмæ йæ хъус дардзæн Транспорт æмæ фæндагон инфраструктурæйы комитет, æмгуыст кæндзæн Хуссайраг Уæлдæфон транспорты агентад æмæ Мидхъуыддæгты республикон министрадимæ. Гæххæтт æхсæнадон уагæвæрд æмæ æдасдзинад фæхуыздæр кæндзæн. Уыдæттæ баст сты, Уæрæсейы Президент Владимир Путины 2022 азы, 19 октябры ист Указимæ. Йæ номыр у №756. Цæгат Ирыстоны раивтой базон цæттæдзинады фæткмæ.
Хъуамæ йæ æмбарæм, æнæтæхæг уæлдæфон наутæ нырыккон уавæрты сабырдзинад æвдисæг нæ вæййынц. Кæм сæ куыд сгарæн техникæйæ кæнæ комкоммæ бынат фехсынмæ пайда кæнынц, бирæ кæмдæрты сæ архайынц. Сæрмагонд хæстон операцийы рæстæг æлхъывд уавæр сæвзæрд, хъуамæ республикæйы цæрджыты æдасдзинадыл хъуыды кæнæм.
«Дронтæй арæнтæм æввахс æмæ бæстæйы мидæг куыд пайда кæнынц, уый æвдисы сабырдзинадæн тæссагдзинæдтæ. Республикæйы ахсджиаг объекттæ чысыл нæй, хъæуы сæ бахъахъхъæнын, уымæ гæсгæ ахæм уынаффæ рахастон. Республикæйы хъуамæ сæ хъус дарой, дронтæй куыд пайда кæнынц, уымæ. Разамонджытæн æмбæлы зонын, аппаратæй куыд æмæ цæмæн пайда кæнынц, уыдæттæ. Республикон разамынд æппæт барадон-нормативон гæххæттытæ федералон гæххæттытимæ сæмхуызон кодта.
Нæ бартæ хæлд нæ цæуынц, фæлæ уый æнæмæнг кæнинаг хъуыддаг у, æнæтæхæг уæлдæфон наутæй пайда нæ кæнын у æдасдзинады домæн. Мах тырнæм нæ тæссагдзинæдтæ фæкъаддæр кæнынмæ, æрмæстдæр — афтæ», — загъта республикæйы Сæргълæууæг Сергей Меняйло.
Куыд зонæм, афтæмæй Уæрæсейы Президент Владимир Путин октябры бафыста, Донецкаг, Луганскаг Адæмон республикæты, Запорожьейы, Херсоны облæстты хæстон уавæр скæныны Указ. Центрон æмæ Хуссайраг федералон зылдты цæттæдзинады фæтк фæбæрзонддæр кодтой. Иннæ регионты, Оренбурджы облæст сæм бафтаугæйæ, скодтой базон цæттæдзинады фæтк. Гæххæтты бæрæг сты, регионты разамонджытæн уавæртæм гæсгæ сæ бон цавæр хæдбар уынаффæтæ хæссын у, уыдæттæ. Сæ кæцыфæнды уынаффæ дæр у æххæстгæнинаг.
Ныртæккæ регионты разамонджытæ бафыстой æнæтæхæг уæлдæфон транспортæй пайда нæ кæныны тыххæй указтæ.
Саутæты Тамилæ
