Уæрæсейы Президент Владимир Путин, политикон парти «Иугонд Уæрæсе» цы хъæппæристæ рахаста, ома газ социалон æгъдауæй фæпарахат кæныны хъуыдыимæ сразы ис.
Политикон парти «Иугонд Уæрæсе»-йы Генералон советы нымæрдар Владимир Якушев телехиды куысты рæстæг Президент Владимир Путины базонгæ кодта партийы хъæппæристимæ. Йæ ныхасмæ гæсгæ, социалон объектты уагдæттæ газимæ баиу кæныны нысантæ хорз ахъаз фæуыдзысты регионты социалон-экономикон рæзтæн. «Ныртæккæ дæр нæм бирæ адæм æрхатыдысты, цæмæй хъæуккаг цæрæнбынæтты Культурæйы хæдзæрттæ дæр уыцы хыгъдмæ бахæссой», – загъта Владимир Якушев.
Политикон парти «Иугонд Уæрæсе»-йы Генералон советы нымæрдар куыд фæбæрæг кодта, афтæмæй парти Уæрæсейы субъекттæй райста фæрæзтæ, цæмæй газимæ баиу кæной цæрæн хæдзæрттæ дæр. Уый руаджы адæмы цардыуаджы фадæттæ зынгæ фæхуыздæр уыдзысты. Уæрæсейы Президент Владимир Путин уыцы партион хъæппæристимæ сразы ис.
Президент рæгъмæ цы хъуыдытæ рахаста, уыдоны загъд æрцыд, ома курын, цæмæй Уæрæсейы Хицауад социалон æгъдауæй газ адæммæ хæццæ кæныны программæ фæпарахадæр кæной. «Бахæссут æм Культурæйы хæдзæрттæ, уыдон хъæуккаг бынæтты сты æхсæнадон царды сæйрагдæр фæзуæттæ. Ацы аз регионтæн Хицауады фæстауæрцы фондæй ноджыдæр ма 1,2 миллиард сомы радих кæнын хъæуы. Уыцы фæрæзтæй адæмæн сæ бон уыдзæн газы ифтонггæрзтæ балхæнын. Ома комкоммæ æххуыс бакæнын адæмæн», – бафæдзæхста Владимир Путин.
Уæрæсейы Президент куыд нымайы, афтæмæй социалон æгъдауæй газ адæммæ фæхæццæ кæныны программæ у регионты, фыдыбæстаг артаджы-энергетикон комплекс æмæ æнæхъæн бæстæйы сæйрагдæр хъæппæристæй иу. Газ хæццæ кæныны программæмæ йæ райдайæнæй фæстæмæ хъус дарынц «Иугонд Уæрæсе»-йы минæвæрттæ бынæтты. Владимир Путин куыд зæгъы, афтæмæй парти рахаста программæ фæпарахадæр кæныны хъæппæристæ, граждæнтæн уæлæмхасæн æххуыс бакæныны мадзæлттæ.
«Газпром»-ы сæргълæууæг Алексей Миллер куыд радзырдта, афтæмæй политикон парти «Иугонд Уæрæсе» «Газпром»-имæ иумæ бавнæлдтой социалон æгъдауæй газ адæммæ хæццæ кæныны программæ царды уадзынмæ. Уый адæмы цардæн хорз фæахъаз уыдзæн. «Фæстаг фондз азмæ программæйы руаджы газ бахæццæ 2150 цæрæнбынатмæ. Уæрæсейы газы хæдзарады историйы ахæм дæнцæгтæ нæма уыд», – фæбæрæг кодта Алексей Миллер.
Цæгат Ирыстоны газы ацы программæ æххæстгонд цæуы рæвдз къахдзæфтæй. Лæвар æй бауагътой 3900 хæдзармæ, республикæ ацы бæрæггæнæнтæм гæсгæ ис дæс хуыздæр регионы ‘хсæн. РЦИ-Аланийы Сæргълæууæг Сергей Меняйло куыд зæгъы, афтæмæй республикæмæ газ бауадзыны æмвæзад у 98 проценты. «Бæстæйы Президент Владимир Путин куыд бахæс кодта, афтæмæй газ фæхæццæ кæны цæхæрадæтты æмбалæдты онг дæр. Змæлдæн бауромæн нæй, разæй нæм æнхъæлмæ кæсы стыр куыст», – загъта политикон парти «Иугонд Уæрæсе»-йы регионалон хайады нымæрдар Сергей Меняйло.
Санаты Альбинæ
