РЦИ-Аланийы Хицауады Сæрдары хæстæ рæстæгмæ æххæстгæнæг Дзанайты Барис цы æмбырд сарæзта, уым ныхас цыд, зæххы хæйттыл хъалон æмæ хаццон фидыны хæс фæкъаддæр кæныныл. Архайдтой дзы профилон министрадты разамонджытæ, Парламенты минæвæрттæ, Дзæуджыхъæуы администраци æмæ республикæйы районты сæргълæуджытæ.
Федералон хъалонисæн управленийы регионалон разамонæджы хæдивæг Кæсæбиты Сергей фехъусын кодта, хæсы бæрц зынгæ кæй фæкъаддæр, æмæ дарддæр дæр уыцы хъуыддагыл куыст кæй цæуы, уый.
Республикæйы паддзахадон исбонад æмæ зæххы ахастдзинæдты министры хæстæ рæстæгмæ æххæстгæнæг Тедеты Руслан дæр радзырдта, зæххы хæйттыл хаццон фидыны хæс фæкъаддæр кæныныл цавæр куыст цæуы, уый тыххæй. Ведомствæйы разамонæг куыд фæбæрæг кодта, уымæ гæсгæ зæрдиаг æмархайд цæуы хъалонисæг оргæнтæ æмæ муниципалон скондты сæргълæуджытимæ.
Дзанайты Барисы ныхасмæ гæсгæ, сæйрагдæр нысантæй иу у, бюджеты алы къабазмæ дæр æфтиæгты рæзт фæфылдæр кæнын. Ацы хъуыддагмæ йæ цæст дары республикæйы Сæргьлæууæг Сергей Меняйло дæр.
– Æфтиæгтæ фæфылдæр кæныныл куыст у республикон æмæ муниципалон бюджетты сæйрагдæр фарста. Æфтиæгтæ цæмæй рæзой, уый тыххæй та хъæуы хъалон фидджытимæ ахадгæдæр куыст кæнын. Курын уæ, цæмæй уæ тыхтæ æрбаиу кæнат æмæ зæрдиагдæрæй бакусат хъалон исыны хæс фæкъаддæр кæныныл, – бафæдзæхста Дзанайты Барис.
РЦИ-Аланийы Хицауады Сæрдары хæстæ рæстæгмæ æххæстгæнæг фæбæрæг кодта, хъалон исыны хæс фæкъаддæр кæнын домы æппæт къабæзты иумæйаг архайд.
Æмбырды фæлгæты бæрæггонд æрцыдысты сæйрагдæр нысантæ – хъалонтæ афойнадыл фидыны хъуыддагмæ карздæр цæстдард куыд уа, хæс фæкъаддзæр кæныныл зæрдиагдæрæй архайын æмæ æххæстгæнæг хицаудзинады оргæнтæ, муниципалитеттæ æмæ хъалонисæг оргæнты куыст фæахадгæдæр кæнын.
ХЪОЙБАЙТЫ Галинæ
