Æфсадмæ фæсиддзысты, сæ кар 18-27 азмæ кæмæн у, уыцы 147 мин лæппумæ. Уый тыххæй Указ бафыста Уæрæсейы Федерацийы Президент Владимир Путин. 1 апрелæй куыст цæуы æппæт æфсæддон комиссарадты дæр.
Дзæуджыхъæуы æфсæддон комиссар Беджызты Роберт куыд фехъусын кодта, афтæмæй уалдзыгон кампанийы рæстæг æфсадмæ фæсиддзысты нæ республикæйы 300 адæймагмæ. Уый фæдыл райдыдтой кусын сæрмагонд къамистæ. Дзæуджыхъæуы æфсадмæ сидыны къамисы сконд сфидар кодта горæты администрацийы сæргълæууæг, бацыдысты йæм мидхъуыддæгты оргæнты, ахуырады управленийы, адæмæн куыст дæттыны комитеты æмæ «Иры Стыр Ныхас»-ы минæвæрттæ.
Сидтонты кæндзысты фистæгæфсæдты, национ гвардийы, æфсæддон-космосон тыхты, æфсæддон-десантон æмæ граждайнаг хъахъхъæнынады æфсæдты службæ кæнынмæ.
Апрел æмæ майы сæ нымæц чысыл вæййы, уый баст у бирæтæн сæ ахуыр фæуыны æмæ дипломтæ райсыны фарстаимæ. Уымæ гæсгæ сидтонтæн сæ фылдæр æфсадмæ ацæуы июны мæйы.
Йæ дин службæ кæнын кæмæн нæ амоны, уыдоны къамис æрвиты 21 мæйы æмгъуыдмæ зæрæдты хæдзæртты, госпитæлты, алыхуызон рынчындæтты кусынмæ. Кæм, уый фæбæлвырд кæны Фæллой æмæ социалон рæзты министрад.
Сергей Дьяконов къамисы уынаффæмæ гæсгæ кæндзæн альтернативон службæ балæвæрд куырдиатмæ гæсгæ, афæдзы æрдæджы фæстæ йын дохтыртæ æркæсдзысты йе ‘нæниздзинады уавæрмæ, куы бахъæуа, уæд æй арвитдзысты Беслæны медицинон центрмæ. Къамисы уæнгтæ йын бамбарын кодтой, дохтырты æркасты фæстæ йæ кæй хъæудзæн 7 апрелы æфсæддон комиссарадмæ æрбацæуын.
Къамисы уæнгтæ бæстон кæсынц æфсадмæ цæуæг лæппуты царды уавæртæм, стæй се ‘нæниздзинадмæ. Зæрдæхсаинаг чи разыны, уый дарддæр арвитынц дохтыртæм, цæмæй сбæрæг кæной, æфсадмæ цæуынмæ бæззы æви нæ.
Раздæрау, фарæстæм къласы фæстæ астæуккаг ахуырад чи райсы, уыцы лæппутæн æфсадмæ сидыны хъуыддаг аргъæвынц афæдзы æмгъуыдмæ. Уый фæстæ сын уæлдæр ахуыргæнæндонмæ бацæуыны æмæ ахуыр кæныны хъуыддаг бар нæ дæтты æфсадмæ цæуынæй хи иппæрд кæнынæн.
«Сидтонтæ нæ архайдзысты Украинæйы сæрмагонд æфсæддон операцийы, сæ службæ æххæстæй дæр цæудзæн Уæрæсейы алы регионты, уыимæ, Сыбыры æмæ Сахалины дæр», — загъта Беджызты Роберт.
Хуыбиаты Ларисæ
Къам систа
Хъайырты Дианæ
