РЦИ-Аланийы Сæргълæууæг Сергей Меняйло Терроризмы ныхмæ къамисы æмæ Оперативон штабы æмбырд скодта. Рæгъмæ рахастой терроризмы ныхмæ уæлæмхасæн фадæттæ ахуырады, артаджы-энергетикон къабазы, промышленносты, ахæм цаутæ ма ‘руадзыны куыст скъоладзаутæ æмæ студентты ‘хсæн кæныны фарстатæ.
Ахуырад æмæ наукæйы министр Алыбегты Эллæ куыд радзырдта, афтæмæй ныртæккæ ахуырадон кусæндæтты терроризмæй æдасдзинады фарстатæм уæлдай æргом здæхт цæуы. «Æппæт кусæндæтты æвæрд æрцыд фехъусын кæныны, тæссагдзинады, видеоцæстдарды техникон фæрæзтæ. Фарстатæм къæрцхъус сты хицæн хъахъхъæнæн организациты кусджытæ-хъахъхъæнджытæ», — загъта министр.
Фæлæ ма уæддæр, Алыбегты Эллæйы ныхасмæ гæсгæ, ис цалдæр кусæндоны, нырмæ сæ æвæрд нæма ‘рцыдысты амынд фæрæзтæ, инженерон-техникон скондтæ. РЦИ-Аланийы разамонæг куыд бацамыдта, афтæмæй ног ахуыры азмæ æппæт скъолатæ, рæвдауæндæттæ, уæлдæр ахуыргæнæндæттæ, училищæтæ, техникумтæ хъуамæ ифтонггонд æрцæуой техникон гæрзтæй.
«Фарста хауы районты разамонджытæм, ахуырады управленитæм, алыг кæнæн кæмæн нæй, ахæм хъуыддæгтæ не сты. Æппæт æмбæлгæ фæрæзтæ сæвæрут ахуырады кусæндæтты», — бафæдзæхста республикæйы Сæргълæууæг. Цæрæнуатон-коммуналон хæдзарады, артаг æмæ энергетикæйы æмæ промышленносты æмæ инвестициты министртæ Таматы Майрæн æмæ Мæрзойты Владимир куыд радзырдтой, афтæмæй къабæзты, ведомствæты ‘хсæн къамис, раиртæста цавæрдæр аипдзинæдтæ.
РЦИ-Аланийы Сæргълæууæг бафæдзæхста Мæрзойы-фыртæн 20 апрелмæ æппæт хъуагдзинæдтæ аиуварс кæнын. Хъуамæ æппæт промышленнон куыстуæттæ скæной паспорттæ, уа сын къордтæ, се сбæрæг кæныны график цæттæгонд æрцæуа. Уæлдай æргом аздахын хъæуы паддзахадон фæдзæхст æххæстгæнæг куыстуæттæм. Артаджы-энергетикон къабазы æппæт куыстуæттæ хъуамæ æдасдзинады домæнтæн дзуапп дæттой. Фыдбылызтæм æмæ æнæнхъæлæджы цаутæм хъуамæ службæтæ уой хæрзцæттæ, уæнгтæй æххæст.
Хетæгкаты Къостайы номыл паддзахадон университеты ректор Огъуаты Алан куыд радзырдта, афтæмæй студентты ‘хсæн профилактикон куыст цæуы, Интернет æнæцæстдард кæй у, уый аххосæй фæсивæд бафтынц алыхуызон тæссагдзинæдтимæ сайттæм. Æрыгæттæн сæ зондахаст фехæлы, паддзахадон уагæй рахизынц террористон-экстремистон архайдмæ. «Уымæ гæсгæ, ахуыргæнæндон, ахæм цаутæ ма ‘руадзынмæ стыр æргом здахы, Мидхъуыддæгты министрады экстремизмы ныхмæ центры кусджытимæ, Национ политикæ æмæ æддагон бастдзинæдты министрадимæ, æхсæнадон организацитимæ, дины минæвæрттимæ фембæлдтытæ аразæм, лекцитæ сын кæсынц, ныхас кæнынц», — загъта Огъуайы-фырт.
«Куыст хъуамæ лæмæгъдæр ма кæна, ныууадзæн æй нæй. Студенттæ æппæты стыр къорд сты, уайтагъд дæлгомммæ хъуыдыгæнджыты ахасты бахауынц. Уый рохгæнæн нæй, уæ куыст рапарахат кæнут», — загъта Сергей Меняйло.
Бæрæгбæтты агъоммæ республикæйы террористон æмæ экстремистон фæзындтытæ ма ‘руадзыныл, уæлæмхасæн æдасдзинады мадзæлттæй спайда кæныныл дзырдта мидхъуыддæгты министр Андрей Сергеев. Æппæт фарстаты тыххæй бæрнон адæймæгтæ райстой комкоммæ хæстæ.
РЦИ-Аланийы
Сæргълæууæджы æмæ Хицауады
пресс-службæ
