РЦИ-Аланийы Хицауады Сӕрдар Дзанайты Барис Мӕскуыйӕ Цӕгат Ирыстонмӕ кусӕг балцы ӕрцӕуӕг, спорты министры хӕдивӕг Азат Кадыровимӕ фембӕлд. Се ‘хсӕн ныхас рауад дарддӕры ӕмгуыстады, республикӕйы спортивон инфраструктурӕйы рӕзты, дзыллон спорты, спортсментӕ ӕмӕ тренертӕн ӕххуыс кӕныны, профилон куыстуӕтты ифтонгады фарстатыл.
Фӕстӕдӕр уӕрӕхгонд ӕмбырды РЦИ-Аланийы федералон программӕ «Царды фӕтк — спорт» ӕххӕст кӕныныл ӕрныхас кодтой. Программӕ у национ проект «Демографи»-йы хай. Дзанайты Барис куыд радзырдта, афтӕмӕй республикӕ зындгонд у йӕ спортивон традицитӕй, нӕ чемпионты бӕрӕггӕнӕтӕй сӕрыстыр стӕм.
«Нӕ тренертӕ сты дӕсны, сӕ фӕлтӕрддзинад кӕстӕртӕн амонынц. Нӕ Хицауады куыст дарддӕр дӕр баст уыдзӕн ацы къабазы, дзыллон спорты рӕзтимӕ, республикӕйы цӕрджытӕн спорты архайынӕн фадӕттӕ саразынимӕ. Республикӕйы Сӕргълӕууӕг Сергей Меняйло нын нӕ размӕ уыцы нысантӕ ӕппынӕдзух ӕвӕры. Ныртӕккӕ ӕппӕт районты кусынц спортивон объекттӕ, физкультурон-дзӕбӕхгӕнӕн комплекстӕ, гом фӕзтӕ. Арӕзт цӕуынц нырыккон спортивон объекттӕ, 2022-2023 азты нӕм 3 миллиард сомӕн аразынц 12 спортивон кусӕндоны, стыр ахъаз нын у Уӕрӕсейы Спорты министрад. Нӕ абоны ныхас у хъӕугӕ, мах цӕттӕ стӕм стыр спортивон ӕнтыстытӕм ӕмӕ бӕрӕггӕнӕнтӕм», — загъта Дзанайты Барис.
Регионалон проект «Царды фӕтк — спорт»-мӕ гӕсгӕ Цӕгат Ирыстоны аразынц бирӕфадатджын спортивон фӕзтӕ, гом физкультурон-дзӕбӕхгӕнӕн комплекстӕ ӕмӕ цӕттӕдзинады фӕзтӕ. Дзӕуджыхъӕуы байгом тренировкӕтӕгӕнӕн нырыккон центр, ӕрыдоны — спортивон комплекс. Бындурон рацарӕзты фӕстӕ байгом стадион «Пищевик».
Физикон культурӕ ӕмӕ спорты министр Хъоцыты Сослан куыд радзырдта, афтӕмӕй спортивон фӕстауӕрцы командӕты хъомылгӕнджытӕн спортивон ифтонггӕрзтӕ, хъӕугӕ дзаума балхӕнынӕн райстой паддзахадон ӕххуыс. Дзӕуджыхъӕуы ӕхгӕд футболон фӕзимӕ, бассейнимӕ аразынц спортивон-дзӕбӕхгӕнӕн комплекс, Заводы поселочы фӕзындзӕн чысыл спортивон фӕз, йӕ сифтонг кӕнынӕн бахъӕудзӕн спортивон-технологон ифтонггӕрзтӕ. Нымад ӕрцыдысты Уӕрӕсейы иугонд командӕтӕм спортивон фӕстауӕрцы командӕтӕ цӕттӕгӕнӕг организацитӕн нысанмӕарӕзт субсидитӕ дих кӕныны хъуыддӕгтӕ. Спортивон цӕттӕдзинад банывыл кӕныны тыххӕй сын хъуамӕ балхӕной спортивон инфтонггӕрзтӕ.
Уӕлдай ӕргом аздӕхтой, Цӕгат Ирыстоны федералон проект «Бизнес-спринт» куыд ӕххӕстгонд цӕуы, уымӕ. Проект баст у спорт равзарынимӕ. Министры ныхасмӕ гӕсгӕ, ахӕм «зондджын» фӕзтӕ фӕзындзысты Сунжӕйы хъӕуы ӕмӕ Мӕздӕджы горӕты. Азат Кадыров куыд бацамыдта, афтӕмӕй федералон проект у ног, республикӕ йӕ царды уадздзӕн фыццаг. «Ахӕм регионтӕ нӕм гыццыл ис, уӕ историон традицитӕ стыр сты, уӕ фидӕн дӕр зӕрдӕмӕдзӕугӕ у, ам спорты хуызты рӕзт уынӕм. Республикӕйы Сӕргълӕууӕг Сергей Меняйлойӕ разы стӕм, йе ‘ххуысы тыххӕй йын бузныг. Федералон бюджетӕй 4 миллиард сомӕн сарӕзтат спортивон инфраструктурӕ, дӕрддӕр дӕр фӕрӕзтӕ дӕтдзыстӕм проекттӕн», — загъта мӕскуыйаг чиновник.
Дзӕуджыхъӕуы ацы аз аразын райдайдзысты нырыккон фӕлтӕры спортивон комплекс — фиджитал-центр. Фӕзуатыл иумӕйаг бынат уыдзӕн классикон ӕмӕ нымӕцон спорты хуызтӕ хуыздӕр ахуыр кӕнынӕн. Фиджитал-центры спортивон фӕзтӕ, компьютерон хъӕзтытӕ ӕмӕ физикон архайд кӕм баиу уыдзысты, ахӕм бынӕттӕ дзы уыдзӕн. Хъоцыты Сосланы ныхасмӕ гӕсгӕ, информацион хыз «Мӕ спорт» регионы скуыста, йӕ бындуры автоматикон фӕрӕз, афтӕмӕй, уый руаджы цӕст дарынц спортивон архайдмӕ.
Уӕрӕсейы спорты министры хӕдивӕг Азат Кадыров куыд бацамыдта, афтӕмӕй хъавынц царды рауадзын фыццаг лӕггад, паддзахадон лӕггӕдты порталы сывӕллоны ныффыссӕн уыдзӕн спортивон скъоламӕ. «Республикӕ разӕй ис ацы хъуыддаджы, спортивон скъолатӕ уӕм сӕрӕнӕй аразынц, бузныг, проектимӕ кӕй сразы стут, уый тыххӕй», — бафиппайдта федералон министры хӕдивӕг. ӕмбырдӕй хатдзӕгтӕ кӕнгӕйӕ, Азат Кадыров куыд радзырдта, афтӕмӕй республикӕйы куыст банымайӕн ис хорзыл, физкультурӕ ӕмӕ спортмӕ ӕмбӕлгӕ цӕстӕй кӕй кӕсут, уый бӕрӕг у.
Дзанайты Барис ма бацархайдта, Азат Кадыров Уӕрӕсейы инвесторты ассоциацийы президент Евгений Вайнеримӕ ӕмӕ хицӕн амалхъомтимӕ цы фембӕлд сарӕзта, уым. Ныхас рауад паддзахадон-хицӕн адӕймӕгты ӕмгуыстады мадзӕлттӕй иугонд информацион ӕмӕ барадон фӕзуаты пайда кӕныныл. Алы регионты кусӕг амалхъомтӕ сӕ фӕлтӕрддзинады тыххӕй радзырдтой, сӕ тыхстаг фарстатӕ дӕр рӕгъмӕ рахастой, хицӕн адӕймӕгты ӕмӕ федералон фӕрӕзтӕй куыд пайда кӕнынц, уыдӕттӕ дӕр фӕбӕрӕг кодтой.
РЦИ-Аланийы Хицауады Сӕрдары ныхасмӕ гӕсгӕ йын ӕхсызгон у, ахӕм ахсджиаг хъуыддагӕн Цӕгат Ирыстон кӕй равзӕрстой, уый. «Мах дӕр спорты рӕзтӕн парахатӕй пайда кӕнӕм инвестортӕ ӕмӕ паддзахады ‘хсӕн ӕмгуыстадӕй. Паддзахадон-хицӕн адӕймӕгты ‘хсӕн архайд нын тынг ахсджиаг у, ацы аз уал бавнӕлдтам Дзӕуджыхъӕуы спортивон комплекс «Клеверспорт» аразынмӕ. Цӕттӕ стӕм инвестортимӕ кусынмӕ», — фӕбӕрӕг кодта РЦИ-Аланийы Хицауады Сӕрдар.
Евгений Вайнер куыд бафиппайдта, афтӕмӕй хицауад ӕмӕ амалхъомадон ӕмӕхсӕнад нысантыл иумӕ куы кусой, уӕд уый хорз бӕрӕггӕнӕн у. «Дзӕуджыхъӕу дзӕгъӕл хуымӕтӕджы нӕ равзӕрcтам, амӕй размӕ ам бафыстам, Цӕгат Кавказы иумӕйаг мадзӕлттӕй спайда кӕныны, фыццаг проект. Нӕ къухы цы проекттӕ бафтыдысты, уыдоныл нӕ бафӕндыд ӕрныхас кӕнын, цӕмӕй ма нӕ бон у инвестортӕн сӕ цуры балӕууын, уыдӕттӕ фӕбӕрӕг кӕнын», — загъта ныхасгӕнӕг.
Азат Кадыров куыд бафиппайдта, афтӕмӕй Цӕгат Ирыстоны фӕзынд фылдӕр инвестортӕ, сӕ фӕрӕзтӕй хъавынц спорты уавӕр фӕхуыздӕр кӕнын. Фембӕлды баныхас кодтой дӕрддӕры ӕмгуыстадыл. Федералон министры хӕдивӕг ма бӕбӕрӕг кодта спортивон объекттӕ, се ‘хсӕн — стадион «Спартак». Скӕсӕйнаг трибунӕйы сфидар кодтой ӕфсӕн-бетон конструкцитӕ, аразджытӕ бавнӕлдтой дӕлбазыр ӕфсӕн конструкцитӕй монтаж кӕнынмӕ. Иннӕ трибунӕты дӕр куыст цӕуы. Азат Кадыров ма Дзӕуджыхъӕуы федта спортивон хъӕбысхӕстӕй тренировкӕтӕ кӕнӕн зал, спортивон комплекс «Клеверспорт»-ы фидӕны фӕзуат, ӕндӕр спортивон куыстуӕттӕ.
Нӕ уацхӕссӕг
