Нæ бæстæйы космонавтикæйы зонады ирд фæд ныууагъта зындгонд конструктор, Советон Цæдисы паддзахадон премийы лауреат Къомайты Руслан. Не ‘хсæн куы нал ис, ууыл рацыд дыууæ азы. Дзæуджыхъæуы йæхæдæг цы Космонавтикæйы скъола сарæзта æмæ йæ ном чи хæссы, уым уыд ахуыргонды номарæн изæр.
Русланы цард æмæ бирæвæрсыг зонадон æмæ рухстауæн архайды тыххæй изæры райдайæны радзырдта Космонавтикæйы скъолайы директор Челдыты Зæлинæ.
Мæйдзæуæн аппараты конструктор йæ царды фæстаг азты Дзæуджыхъæу æмæ нæ республикæйы рæзгæ фæлтæрæн цы хæрзты бацыд, йæ хъæппæрисæй Космонавтикæйы скъола кæй байгом, уыцы цау Русланы уарзон газет «Рæстдзинад»-ы куыд парахатæй æвдыст æрцыд, ныр дæр йæ рухстауæн архайдмæ редакци йæ хъус лæмбынæгæй кæй дары, уый тыххæй фысымтæ æмæ уазджытæн бæстон радзырдта газеты сæрмагонд уацхæссæг, УФ-йы Фысджыты цæдисы уæнг Гасанты Валери. Скъолайæн балæвар кодта йæ ног чиныг «Амонды къæсæр». Автор æм бахаста Къомайты Русланимæ йæ интервью.
Номдзыд ахуыргонд æмæ Ирыстоны патриоты тыххæй сæ мысинæгтæ радзырдтой йæ сабидуджы хæлар, фæллойы ветеран Æлбегаты Батрадз, йе ‘мкурсон Гасситы Аслæнбег.
Мæскуыйы Лавочкины номыл зонадон куыстадон иугонды коллективы номæй цы фыстæг райстой Космонавтикæйы скъолайы ахуыргæнджытæ æмæ ахуырдзаутæ сæ бындурæвæрæджы номарæн боны фæдыл, уый бакаст Челдыты Зæлинæ.
Сæ зонд æмæ уды тыхтæ Къомайты Русланы фарн рæсугъдæй фидæнмæ хæссынæн кæй нывонд кæндзысты, уый тыххæй Комонавтикæйы скъолайы ахуыргæнинæгтæ цы зæрдæагайгæ нывæцæнтæ ныффыстой, уыдонмæ зæрдиагæй байхъуыстой номарæн изæры архайджытæ.
Зындгонд ахуыргонды зонадон куысты стыр ахадындзинады тыххæй сæ хъуыдытæ радзырдтой: Цæгат Кавказы Хæххон металлургон институты историйы музейы сæргълæууæг Фидараты Нелли æмæ Дзæуджыхъæуы Алайнаг гимназы директор Цæразонты Мæдинæ.
Космонавтикæйы скъолайы ахуыргæнæг Виктор Левашов бакаст йæхи фыст æмдзæвгæ Къомайты Русланы тыххæй.
Сæ зындгонд æрвадæн, йæ цард æмæ зонадон архайды бæркадджын бынтæ фæлтæртæм рæсугъдæй хæссыныл кæй архайынц, уый тыххæй Космонавтикæйы скъолайы коллектив æмæ номарæн изæры архайджытæн арфæ ракодта мыггаджы дзырддзæугæ хистæртæй иу — Къомайты Барис.
Йæ зæрдæагайгæ зарæгæй архайджыты зæрдæтæ барухс кодта Космонавтикæйы скъолайы ахуыргæнинаг Санахъоты Эдислав.
Номарæн изæры размæ Космонавтикæйы скъолайы ахуыргæнджытæ æмæ ахуырдзаутæ бабæрæг кодтой Къомайты Русланы ингæн, сæвæрдтой дидинджытæ.
Анвараты Валери
