РЦИ-Аланийы Сæргълæууæг Сергей Меняйло дипломтæ æмæ æхцайы премитæй схорзæхджын кодта, наукæ æмæ техникæйы къабазы нæ республикæйы æрвылазон конкурсы уæлахиз кæй къухы бафтыд, уыцы скъолаты ахуырдзаутæ æмæ æрыгон ахуыргæндтæ-специалистты.
Конкурсмæ хаст æрцыд 13 наукон проекты медицинæ, биохими, физикæ, экологи æмæ æндæр темæтыл. Нæ республикæйы Сæргълæууæг æрыгон фæлтæримæ зæрдæйæ-зæрдæмæ ныхасы фæнысан кодта, амондджын фидæн аразыны хъуыддæгты, фыццаджыдæр, наукæйы рæзтмæ кæй хъæуы æргом здахын.
— Æнæ наукæйæ нæй размæ цæуæн. Тынг æхсызгон мын у, æмæ сæрыстыр дæн, курдиатджын æрыгон фæлтæр нæм кæй ис, уымæй. Ныридæгæн, ахæм æвзонджы кары уæ къухы цы æнтыстдзинæдтæ бафтыд, уыдон уын наукæйы бæрзæндтæм схизыны къахдзæфтæ сты. Ис уæм бæллицтæ, хорздзинæдтæм тырнæг фæсивæд стут, æмæ уын мах дæр æххуыс кæндзыстæм, кæм бахъæуа, уым. Раст фæндаг равзæрстат æмæ йыл фæрнæй цæут, — загъта Сергей Меняйло.
Скъоладзауты къорды номинацийы, Дзæуджыхъæуы 3-æм скъолайы ахуырдзау Чивиты Азæмæтæн преми лæвæрд æрцыд йæ конкурсон темæ «Разработка комплексного растительного препарата с заданной нейротропной активностью»-йы фæдыл. Азæмæт, ахъаззаджы хос кæй хонæм, уыцы кæрдæджыты къордæй сарæзта уæлæмхасæн компоненттæ æмæ бакуыста, адæймаджы организмыл куыд ахадынц, ахæм иртасæн куыст. Дзæуджыхъæуы 26-æм скъолайы ахуырдзау Эрик Медведев та сарæзта, «полупроводниковый прибор» кæй хонынц, уый. Пайда дзы кæнынц электронон къабазы ахуырадон системæйы æмæ алыхуызон техникон къордты куысты. Фæсивæды инновацион центры авторон коллективы къорд: Гулуты Азæмæт, Мæхъиты Алыксандр, Харебаты Георги, Мæрзойты Сослан, Годжыцаты Алыксандр конкурсы лауреаттæ систы сæ проект «Приложение для создания чертежей в векторной графике»-йы тыххæй. Æвзонг ахуырдзаутæ бакуыстой, æнæ уæлдай лыггæгтæй (обрезки) фанерæй къоппытæ æмæ контейнертæ аразынæн сæрмагонд программæйыл.
Номинаци «Æрыгон ахуыргæндтæ æмæ специалисттæ»-йы та диплом æмæ æхцайы премийæ хорзæхджынгонд æрцыд: Дзæуджыхъæуы наукон центры специалист Дзампаты Жаннæ. Уый бакуыста, пародонтит дзæбæх кæныны хъуыддаджы, нæ республикæйы фæзуатыл цы хосгæнæн кæрдæджытæ зайы, уыдонæй комплексон мадзæлттæ аразыны фæдыл æмæ Дзæуджыхъæуы наукон центры авторон коллективы къорды минæвæрттæ Кетеван Корбесова æмæ Дзоблаты Лаурæ та сарæзтой, Дзæуджыхъæуы экологи æмæ уæлдæфыл транспорты æппæрццæг хауæццæгтæ æвзæрæрдæм куыд ахадынц æмæ цавæр ахъаззаджы мадзæлттæ саразæн ис ацы фарстамæ биноныг цæстдарыны фæдыл, уый тыххæй сæхи проекты картæ.
Конкурс арæзт цæуы, техникæ æмæ наукæйы къабазмæ зынгæ æвæрæн чи хæссы, нæ экономикæйы рæзтæн ног технологитæ æмæ методикæйы бакуыстыл чи архайы, уыцы æрыгон ахуыргæндтæ æмæ специалистты æнтыстдзинæдтæн аргъ скæныны фæдыл.
Саутæты Тамилæ
