Мæздæджы районы, Хъызлары хъæуы, проект «Нырыккон горæты фалдзустæ рацаразын»-ы фæлгæты, банывыл кодтой Уæлахизы æвдай азы номыл парк. Проекты фыццаг къæпхæны фидæны парчы фæзуат— æхсæз гектары — ссыгъдæг кодтой, уый фæстæ куыстытæм бавнæлдтой ландшафтон архитектортæ.
Парчы проект сарæзтой бынæттон цæрджыты фæндæттæм гæсгæ, стæй ма хыгъд æрцыдысты климæты хицæндзинæдтæ æмæ, паркæн кæй равзæрстой, уыцы зонæйы нысан. «Афтæмæй дзы сарæзтой фистæгæй цæуджытæн фæндæгтæ æмæ асфальтæй æхгæд фæндаг велосипедисттæн. Фæзуаты сæвæрдтой фæллад уадзынмæ бандæттæ æмæ бырондæттæ. Парчы светодиодон рухсгæнæнтæ ныссагътой. Фæзуат æрæхгæдтой æфсæйнаг быруйæ, зæхх дурæй бамбæрзтой, — фехъусын кодтой Цæрæнуатон-коммуналон хæдзарады, артаг æмæ энергетикæйы министрады.
Парчы фæзуаты ма хæстæгдæр рæстæджы фæзындзысты тренажерон æмæ спортивон фæзтæ.
Датиты Ольгæ
