Знон, Мæскуыйы, Адæмон хæдзарады æнтыстдзинæдты æппæтуæрæсеон цæдисы дунеон равдыст-форум «Уæрæсе»-йы уыд Цæгат Ирыстон-Аланийы Бон. Райдыдта 12 сахатыл, уырдæм, ома, 75-æм павильонмæ, æрбацыдысты нæ республикæйы минæвæрттæ, зæрдæйæ йæ чи уарзы, базонын æй кæй фæнды, æппæт уыцы адæм.
РЦИ-Аланийы Сæргълæууæг Сергей Меняйлойы ныхасмæ гæсгæ, нæ регион хъæздыг у хъазуатон фæллойгæнæг адæмæй, номдзыд спортсментæй, культурæйы кусджытæй. Цæгат Ирыстоны Бонмæ бацæттæ кодтой æвæджиауы программæ, æрбацæуæг уазджытæн фадат уыдзæн нæ зындгонд спортсментимæ фембæлынæн, мастер-класстæ дæр скæндзысты.
Афтæ зæгъæн ис, æмæ Адæмон хæдзарады æнтыстдзинæдты æппæтуæрæсеон цæдисы фæзыл дæсгай фембæлдтытæ скæндзысты, уазджытæ базонгæ уыдзысты нæ республикæйы рæзтимæ, радзурдзысты сын нæ культурæйы, традициты тыххæй. Уæдæ нæ раззагдæр коллективтæ æмæ зарæггæнджытæ дæр сæ курдиат равдисдзысты. Уазджытæ бакæсдзысты ирон адæмон хæринæгтæ куыд конд цæуынц, уымæ дæр.
РЦИ-Аланийы разамонæг Сергей Меняйло куыд радзырдта, афтæмæй уазджытæм æнхъæлмæ кæсы уæлдай диссаг. «Æххæстæй йæ нæ дзурдзынæн, фæстæдæр мæ сусæгдзинæдтæ раргом кæндзынæн. Республикæйы Бон нæм æгас цæут, зынаргъ æмбæлттæ! Æппæт Уæрæсейæн нæ фæнды равдисын, нæ уарзон Ирыстон куыд рæсугъд у, уый», — ахæм уыдысты республикæйы Сæргълæууæджы ныхæстæ.
(«ОсНова»)
