РЦИ-Аланийы Хицауады Сæрдар Дзанайты Барис фембæлд Тæтæры Республикæйы официалон делегацийы уæнгтимæ. Сæ сæргъы лæууы республикæйы Хицауады Сæрдары хæдивæг, Тæтæры Æппæтдунеон конгрессы национ советы сæрдар Василь Шайхразиев. Дыууæ субъектты минæвæрттæ сæмбæлдысты Хицауады хæдзары.
Архайдтой дзы РЦИ-Аланийы Хицауады Сæрдары хæдивæг Томайты Ирбег, национ политикæ æмæ æддагон бастдзинæдты министр Бæгъиаты Алан, нациты ‘хсæн æхсæндон змæлды сæрдар Лæгкуты Вячеслав, Тукайы номхæссæг Тæтæры национ-культурон æхсæнады сæрдар Галия Гусейнова. Уазджытæн æгасцуай зæгъгæйæ, Дзанайты Барис фæбæрæг кодта, ахæм фембæлдтытæ тынг ахсджиаг кæй сты, уыдоны руаджы культурон, экономикон, хæлардзинады бастдзинæдтæ фидардæр кæй кæнынц.
«Цæгат Ирыстон у бирæ национ æмæ бирæ динты республикæ, цæрæм иу дзæбæх бинонтау, уыцы уавæрæн стæм бæрнон. Нæ республикæйы Сæргълæууæг Сергей Меняйло уымæ хъус дары. Ирыстоны зæххыл тæтæйраг адæмы минæвæрттæ рагæй цæрынц. Уæ традицитæ, æгъдæуттæ ам хъахъхъæд цæуынц. Уæ адæмы истори дарддæр дæр адæтдзысты иннæ фæлтæртæм, 30 азæй уæлæмæ Тæтæры национ-культурон æхсæнад республикæйы царды сæрæнæй архайы. Уый тыххæй бузныг зæгъын Галия Гусейновайæн, Лæгкуты Вячеславы разамындæй «Нæ Ирыстон» æппæт хъуыддæгты дæр ис разæй», — загъта Дзанайы-фырт.
Куыд ма бацамыдта, афтæмæй Цæгат Ирыстоны национ политикæ баст у культурон хæзнатæ бахъахъхъæнын æмæ сæ фæфылдæр кæнынимæ, нациты ‘хсæн бастдзинæдты рæзтимæ. «Цæгат Ирыстоны географион уавæр нымайгæйæ, кæддæриддæр уыдыстæм ахсджиаг культурон æмæ æхсæнадон цауты центр. Фарон федералон æмвæзады сбæрæг кодтам Аланийыл саргъуыды 1100 азы бæрæгбон. Ацы аз та бæрæг кæндзыстæм Ирыстон Уæрæсеимæ баиуы 250 азы, Дзæуджыхъæуы 240 азы æмæ республикæйы автономийы 100 азы. Хонæм уæ уыцы бæрæгбæттæм», — фæбæрæг кодта Дзанайты Барис.
Василь Шайхразиев куыд бафиппайдта, афтæмæй Уæрæсе тынг стыр бæстæ у, Калининградæй Камчаткæмæ, Мурманскæй Дзæуджыхъæумæ. «Абон Хъазан æмæ Дзæуджыхъæуы ‘хсæн комкоммæ бастдзинæд кæй ис, уымæй зæрдæ райы. Бирæ фарстатæ æнцонæй æмæ рæвдздæр лыггонд цæуынц. Аэропорты фæсдзыд кæнджыты службæ куыд дзæбæх кусы, уымæ кæсын æхсызгон уыд. Туристтæн уый хорз æххуыс уыдзæн. Тæтæры Республикæйы разамынд цæттæ сты æргом ныхасмæ, æмгуыстадмæ. Мах, куыд Хицауады уæнгтæ, афтæмæй делегацитыл æмбæлæм, кæсæм, фæлтæрддзинадæй пайда кæнæм. Нæ размæдзыдæн уыдæттæ тынг ахсджиаг сты», — загъта Тæтæры Республикæйы Хицауады Сæрдары хæдивæг.
Тæтæры Республикæйы официалон делегацийы балц баст у Цæгат Кавказы федералон зылды тæтæйраг æхсæнæдты цæугæ æмбырдимæ. Хъуамæ равзарой регионты ‘хсæн культурон æмæ гуманитарон æххуысы мадзæлттæ рапарахат кæныны фарстатæ, уымæй уæлдай, спайда кæндзысты федералон зылды æхсæнадон иугæндты этникон æмæ культурон фæлтæрддзинадæй.
Бутаты Эльзæ
