Хуссар Ирыстоны цæуы республикæйы Президент равзарыны кампани.
Республикæ Хуссар Ирыстоны Президенты рагагъоммæйы æвзæрстытæ куыд цæуынц, уымæ цæст дарыны тыххæй аккредитаци райстой 70 уацхæссæджы, уыдон сты уæрæсейаг æмæ хуссарирыстойнаг дзыллон хабархæссæг фæрæзты минæвæрттæ. Ацы хабар фехъусын кодта Хуссар Ирыстоны Мыхуыр æмæ информацийы паддзахадон комитеты сæрдар Хъотайты Мария. Йæ ныхасмæ гæсгæ, Цæгат Ирыстоны æвзæрстытæ дæр куыд цæуынц, уымæ цæст дардзысты, аккредитаци лæвæрд кæмæн æрцыд, 17 уыцы журналисты.
– Журналисттæн аккредитаци дæттыны æмгъуыд, æмбæлгæ уагæвæрдмæ гæсгæ, райдыдта, æвзæрстытæм дыууæ къуырийы ма куы баззад, уæд, – загъта комитеты сæрдар. Стæй ма йæ ныхасыл бафтыдта, аккредитацигонд журналисттæн кæй ис, республикæйы территорийы, стæй уый арæнты æдде цы æвзарæн участоктæ ис, уым уæвыны бар. Информацион куыст цæуы æвзарæн къамисы пресс-центры дæр.
– Нæ уæрæсейаг æмгуыстгæнджытæ цалдæр боны уыдзысты ам, æмæ сын сæ куысты фæдыл арфæ, – загъта Хъотайты Мария.
(Информацион агентад «Рес»)
