Знон Тӕбӕхсӕуты Балойы номыл академион театры фӕзы Иры дзыллӕ йӕ фӕстаг фӕндагыл арвыстой номдзыд музыкант, дирижер, фӕндырдзӕгъдӕг ӕмӕ рухстауӕг Гӕздӕнты Гаппойы фырт Булаты.
Фӕзы саударӕн ӕмбырдмӕ ӕрбамбырд бирӕ адӕм. Цӕгат Ирыстон-Аланийы разамонджытӕ, нӕ республикӕйы Парламент ӕмӕ Культурӕйы министрады бӕрнон кусджытӕ, сфӕлдыстадон интеллигенци ӕмӕ ӕхсӕнады минӕвӕрттӕ, делегацитӕ Хуссар Ирыстон ӕмӕ Цӕгат Кавказы регионтӕ ӕмӕ нӕ республикӕйы районтӕй, аивадуарзджытӕ, Гӕздӕнты мыггаг, хиуӕттӕ ӕмӕ хӕстӕджытӕ, Булаты райгуырӕн хъӕу Ольгинскӕйы цӕрджытӕ.
Нӕ аивады фарны рухсӕссӕг цырагъдар Гӕздӕнты Булаты табӕт Ирон театры фӕзӕй, йӕ фӕндыры аив зӕлтӕм, тыхджын къухӕмдзӕгъдимӕ Иры фӕсивӕд рахастой Дзӕуджыхъӕуы Намысы Аллеймӕ ӕмӕ йӕ сӕмбӕлын кодтой йе ‘нусон бынатыл.
