РЦИ Аланийы Хицауады Сӕрдар ДЗАНАЙТЫ Барис цы ӕмбырд сарӕзта, уым ныхас цыдис, цӕмӕй, абон туристон къабазы тынг чи хъӕуы, ахӕм специалисттӕ цӕттӕ кӕной, куыстмӕ ист цӕуой, аттестацигонд экскурсоводтӕ ӕмӕ ма туристон индустри ӕмӕ Ирыстоны уазӕгуарзондзинады бирӕ ӕндӕр вазыгджын фарстатыл. Ӕмбырды архайдтой ахуырадон уагдӕтты разамонджытӕ ӕмӕ бизнесы минӕвӕрттӕ.
Республикӕйы ахуырад ӕмӕ наукӕйы министр Алыбегты Эллӕ, Туризмы комитеты сӕрдары хӕстӕ рӕстӕгмӕ ӕххӕстгӕнӕг Кочиты Сос-лан, Адӕмӕн куыст дӕттыны комитеты сӕрдар Цъӕхилты Чермен ӕмӕ экономикон рӕзты министры фыццаг хӕдивӕг Олег Быкадоров дзырдтой, кадртӕ кӕй нӕ фаг кӕны ӕмӕ уый тыххӕй кӕй хъӕуы ахуырты системӕ рацаразын, туризмы къабазы чи архайы, уыдонӕн сӕ фӕлтӕрддзинад фӕуӕлдӕр кӕныны курсытӕ саразын практикон ахуыртимӕ.
Куыд фӕбӕрӕг кодтой, афтӕмӕй астӕуккаг ахуырады 27 уагдонӕй 10 цӕттӕ кӕнынц специалисттӕ программӕ «Туризм ӕмӕ уазӕгуарзондзинад»-мӕ гӕсгӕ. 2024-25 ахуыры азмӕ, ӕмткӕй райсгӕйӕ, уыдоны ис 580 бынаты — фаронимӕ абаргӕйӕ, 50 фылдӕр ӕмӕ дыууӕ хатты фылдӕр — 2021 азимӕ абаргӕйӕ. Уымӕй уӕлдай ма ацы аз Дзӕуджыхъӕуы политехникон техникум, 2025 аз федералон бюджетӕй паддзахадон ӕххуыс лӕвӕрд кӕмӕн ӕрцӕудзӕн субсидиты хуызы федералон проект «Профессионалитет»-ы фӕлгӕты, уыцы конкурсы 15 уӕлахиздзауы хыгъдмӕ бахауд. Гранты фӕрӕзты руаджы арӕзт ӕрцӕу-дзӕн ахуырадон кластер туризм ӕмӕ лӕггӕдты къабазӕн ӕххуысӕн ӕмӕ баиу кӕндзӕн астӕуккаг профилон профессион ахуырадон уагдӕттӕ. Уый та ратдзӕн фадат хъӕугӕ дӕсныйӕдтыл специалисттӕ цӕттӕ кӕнынӕн. Паддзахадон ӕххуыс у 70 милуан сомы, сӕ руаджы материалон-техникон базӕ, ахуырадон ӕмӕ куыстадон инфраструктурӕ нырыккон уагыл рацараздзысты.
Премьер-министр куыд фӕбӕрӕг кодта, афтӕмӕй бӕрзонддӕр ӕмвӕзадмӕ сисын хъӕуы, аттестацигонд чи ‘рцӕудзӕн, ахӕм гидтӕцӕттӕ кӕныны куыст. Республикӕйы аразынц ног объекттӕ, хъӕудзӕн фылдӕр специалисттӕ туристон къабазы. Дзанайты Барис бахахх кодта, уыцы хъуыддагыл хъуамӕ ӕмвӕнд ӕмӕ ӕмхъарутӕй кӕй архайой профилон оргӕнтӕ, ӕххӕстгӕнӕг хицауад ӕмӕ бизнесы минӕвӕрттӕ.
Туристон къабазы минӕвӕрттӕ сӕхи рады загътой, фылдӕр кӕй хъӕуы хӕринаггӕнджытӕ, официанттӕ, аттестацигонд гидтӕ, администратортӕ.
— Мах уынӕм экономикӕйы ацы къабазы хорзырдӕм ивддзинӕдтӕ. Нӕ субъект тынг рӕсугъд у, ис ын рагон истори, хъӕздыг традицитӕ, хорз, зӕрдӕхӕлар адӕм. Ацы азы фондз мӕймӕ Цӕгат Ирыстонмӕ уазӕгуаты ӕрбацыд 800 мин адӕймагӕй фылдӕр. Уый бӕрзонд бӕрӕггӕнӕн у. Нӕ республикӕйы Сӕргълӕууӕг Сергей Меняйло нын нӕ размӕ нысан ӕвӕры ӕппӕт хъӕугӕ уавӕртӕ аразын туристон къабазы рӕзтӕн, — загъта Дзанайты Барис.
Хицауады Сӕрдар РЦИ-Аланийы Туризмы комитетӕн бахӕс кодта Ахуырад ӕмӕ наукӕйы министрад ӕмӕ Адӕмӕн куыст дӕттыны комитетмӕ туристон къабазы инвестортӕ ӕмӕ куыстдӕтджыты домӕнтӕ хъӕугӕ специалистты фӕлтӕрддзинад фӕбӕрзонддӕр кӕнын ӕмӕ кадртӕ ногӕй бацӕттӕ кӕныны тыххӕй. Ахӕм куыст бакӕнын хъӕуы Хъӕууон хӕдзарады министрадимӕ дӕр проект «Агротуризм»-мӕ гӕсгӕ.
ГАПБАТЫ Алетӕ
