Уӕрӕсейы Мидхъуыддӕгты ӕфсады оргӕнтӕй бирӕ хорзӕхтимӕ пенсийы рацӕугӕйӕ, ТУАТЫ Руслан ӕмӕ ТУАТЫ-ДЗУАТЫ Ларисӕйы ас-тӕуккаг фырт, Артур, йӕ бинойнаг Верӕ ӕмӕ йӕ ӕртӕ фыртимӕ ӕрцард Адлеры. Службӕйы фӕстӕ райдыдта амалхъомады куыст кӕнын. Йӕ бинонтӕ дарыны фаг кодта, уый нӕ, фӕлӕ ма ӕххуыс кодта йӕ ныййарджытӕ, йе ‘фсымӕртӕн дӕр. Цыбыр дзырдӕй, разы уыд йӕ цардӕй.
Фӕлӕ сӕрмагонд ӕфсӕддон операци куы райдыдта, уӕд йӕхицӕн бынат нал ардта. ӕрымысыд, йӕ фыдыфыд Виктор куыд сӕрӕнӕй равдыста йӕхи Фыдыбӕстӕйы Стыр хӕсты. Лӕгдзинад ӕвдисӕг сгарӕджы бирӕ ордентӕ ӕмӕ майдантӕ йӕ цӕстытыл ауадысты. Уӕдӕ, уый фыд, Хъырым дӕр, уыд хӕстон лӕг. «Хъӕддаг дивизийы» архайӕг, райста Георгийы дзуары хӕрзиуджытӕ дыууӕ хатты. Йӕхӕдӕг дӕр чысыл фӕлтӕрддзинад нӕ райста службӕ кӕнгӕйӕ. Бирӕ ӕнтыстытӕ йын уыд Уӕрӕсейы гвардийы сӕрмагонд дӕлкъорды тӕссаг хӕстӕ ӕххӕст кӕнгӕйӕ, ӕмӕ ныр, бӕстӕ ахӕм уавӕры куы ис, уӕд уый та йӕ хӕдзары бада?! Йӕ рагфыдӕлты фарн дарддӕр ма ахӕццӕ кӕна, уый йӕ сӕрмӕ не ‘рхӕсдзӕн.
Бавдӕлдис ӕмӕ архайын райдыдта сӕрмагонд ӕфсӕддон операцимӕ афтыныл. Фӕндыдис ӕй исты пайда йӕ фӕлтӕрддзинадӕй ӕрхӕссын. Йӕ бинойнаг ӕмӕ йе ‘ртӕ сывӕллоны арвыста Ирыстонмӕ, йӕхӕдӕг ацыд ӕфсӕддон комиссарадмӕ. ӕмӕ йын загътой, адӕм ӕмбырд кӕнын хъӕуы, ӕмӕ дӕ дыууӕ мӕйӕ раздӕр нӕ бон нӕ бауыдзӕн арвитын, зӕгъгӕ. Уӕд Ирыстонмӕ ссыд, ам дӕр ын загътой, ӕнхъӕлмӕ кӕсын хъӕуы, зӕгъгӕ. Кӕмӕйдӕр фехъуыста Цӕцӕны «Ахмат»-ы кой ӕмӕ уырдӕм ацыд.
Гуыдырмесы сӕрмагонд нысаниуӕджы службӕйы университеты цӕттӕгӕнӕн ахуырты фӕстӕ дыууӕ къуыримӕ 250 адӕймаджы уыдысты цӕттӕ.
Артуры дарддӕры фӕндӕгтӕ куыд цыдысты, уый тыххӕй та йын байхъусӕм йӕхимӕ:
— Тохы быдырмӕ ныххӕццӕ стӕм ӕмӕ ӕвӕстиатӕй размӕ ахӕцыдыстӕм. Цыдӕр вазыгджын хъуыддаджы ӕххуыс хъуыдис, ӕмӕ нӕ уырдӕм баппӕрстой. Фыццаг хӕстон архайдӕй куы ӕрбаздӕхтыстӕм, уӕд мӕ ме ‘мбӕлттӕ нал уагътой, ды слӕуу къорды сӕргъы, зӕгъгӕ. Нӕ сын куымдтон, фӕлӕ мӕм поселок Хуссайраджы цӕрӕг Бекмӕрзты Аркади бахатыд, ӕрлӕуу, зӕгъгӕ, ӕмӕ уӕд сразы дӕн. Иу мӕйы фӕстӕ мӕ къорды уыдис цыппор адӕймаджы.
Дыууӕ мӕйы фӕстӕ нын раттой цыппар танчы. Сӕ адӕм та уыдысты махӕй, «Ахмат»-ӕй нӕ, фӕлӕ Луганскӕн йӕхи цӕрджытӕй. Батальоны ирӕттӕ чи уыд, уыдоны мӕхимӕ нӕ истон, уымӕн ӕмӕ зын рӕтты уыдтӕн ӕмӕ сын тӕрсгӕ кодтон фыдбылызы бахауынӕй.
Горӕт, кӕнӕ-иу хъӕу куы райстам, уӕд дарддӕр нӕ архайд цыди тыгъд быдырты, акъоппыты. Хи дзы нӕмыгӕй бахъахъхъӕнын уыд тынг зын хъуыддаг.
Дыууӕ мӕйы дӕргъы ӕххӕст кодтам мӕ къордимӕ хӕстон хӕстӕ ӕмӕ цыдыстӕм размӕ — Бахмут, Соледар.
Артуры ныхӕстӕм гӕсгӕ, йе ‘ппӕты уӕззаудӕр бонтӕ уыдысты, фыццаг цӕфтӕ куы баййӕфта, уӕд. Стыр ныфс ын лӕвӕрдтой йӕхиуӕттӕ ӕмӕ йӕ бинонтыл хъуыдытӕ, алы къуыри дӕр-иу семӕ ныхас кодта телефонӕй.
— Хӕсты чи вӕййы, уый ӕдзухдӕр фӕхъуыды кӕны, фӕмысы йӕхиуӕтты. Куыд цӕрынц уым йӕ мад, йӕ фыд, йӕ бинойнаг, йӕ сывӕллӕттӕ, йе ‘фсымӕртӕ ӕмӕ йӕ хотӕ. Хӕдзары йӕм ӕнхъӕлмӕ кӕй кӕсынц, уый адӕймагӕн дӕтты ныфс ӕмӕ хъару. ӕвзӕрдӕр у, адӕймагмӕ куы ничи ӕнхъӕлмӕ кӕса, уӕд уый. Ахӕм лӕппутӕ та хӕсты, хъыгагӕн, чысыл нӕ уыд, — зӕгъы ӕрхӕндӕгӕй Артур.
Рог цӕфтӕ-иу фӕцис Артур, фӕлӕ сӕ йӕ бинонтӕн нӕ, сӕхи дохтырӕн дӕр сӕ нӕ хъӕр кодта, худинаг ӕм каст. Афтӕ дӕр-иу уыдис, ӕмӕ-иу нӕмыджы схъистӕ йӕхӕдӕг карды бырынкъӕй куы сӕппӕрста. Иуахӕмы та, йӕ къордимӕ бӕрӕгдзау ацӕугӕйӕ, бахаудтой знаджы ӕхсты бын. Фӕцис уӕззау цӕф. Госпитӕлмӕ куыд бахаудта, уый дӕр нал базыдта. Фӕстӕдӕр куыд мысыд, афтӕмӕй йӕхимӕ куы ӕрцыд, уӕд ӕй фӕндыд фӕстӕмӕ хӕсты цӕхӕрмӕ йӕ къордмӕ, уымӕн ӕмӕ йӕм уым ӕнхъӕлмӕ кастысты. Фӕлӕ йын бирӕ рӕстӕджы хостӕ не ‘ххуыс кодтой. Йӕ къӕхтӕ ӕмӕ къухты нал ӕмбӕрста. Ныр чысыл фӕхуыздӕр. Иу ӕмӕ дыууӕ госпитӕлы нӕ фӕцис, Луганск, Алчевск, Ростов, Волгоград. 2023 азы январы ӕрыздӕхт нӕхимӕ. Уӕдӕй фӕстӕмӕ алы афӕдзы ӕмбис дӕр иу хатт ацӕуы дзӕбӕх кӕныны курс.
— Мӕ къордимӕ бӕрӕгдзау ацӕугӕйӕ, хъулайы куы бахаудтам, уӕд нӕм ӕвӕстиатӕй ӕххуысмӕ фӕзындысты Бекмӕрзты Аркади ӕмӕ Джиоты Владислав, госпитӕлмӕ куы бахаудтӕн, уӕд мӕм ӕрбахӕццӕ сты Сочийы хъармгӕнӕн хызты хайады хицау Хъараты Ростиславы фырт Сослан ӕмӕ мӕ хистӕр ӕфсымӕр Алан. Уыдон ссардтой Хуссар Ирыстоны официалон минӕвар Хъараты Хъауырбеджы фырт Сосланы, уый уыцы рӕстӕг уыд Луганскы ӕмӕ сын баххуыс кодта мӕн ссарынӕн. Уый абон дӕр стыр ӕххуыстӕ кӕны, нӕ хӕстонтӕй зынг цӕхӕры чи архайы, уыдонӕн. Стыр бузныг мӕ зӕгъын фӕнды мӕ командиртӕ Бигъаты Альберт, Хъуысаты Батраз, Беппиты Инал, Хусаин Барзиевӕн, Уӕрӕсе ӕмӕ фӕсарӕнты хъазахъхъаг хӕстонты цӕдисы ӕхсӕнадон организацийы разамонӕг Мырыкаты Константинӕн. ӕз дӕн уыцы цӕдисы есаул. Абон уыцы цӕдис хӕстонтӕн ӕххуыс кӕны, ӕрвиты сын гуманитарон ӕххуыс, — дзуры Артур.
— Хицӕнӕй мӕ арфӕйы ныхас зӕгъын фӕнды
Тулойты Аланӕн. Уый стыр ӕххуыс кӕны не ‘мзӕххонтӕ ӕмӕ, бынӕттон цӕрджытӕй зын уавӕры чи бахауы, уыдонӕн. Арфӕ кӕнын Рауф Исмаиловӕн — меценат ӕмӕ волонтер, паддзахадон фонд «Фыдыбӕстӕ хъахъхъӕнджытӕ»-йы Дзӕуджыхъӕуы филиалы ӕппӕт кусджытӕн дӕр, йӕ разамонӕг Хетӕгкаты Маринӕ, йӕ хӕдивӕг Гецаты Маринӕ, йӕ иннӕ хӕдивӕг медицинон фарстаты Цыбырты Льянӕ, мӕ куратор Цӕрӕкты Мӕдинӕйӕн.
Артур арфӕйы ныхӕстӕй ӕрымысыд республикӕйы Сӕргълӕууӕг Сергей Меняйло, РЦИ-Аланийы раздӕры Сӕргълӕууӕг Битарты Вячеслав ӕмӕ «Иры Стыр Ныхас»-ы сӕрдар Уататы Зелимханы. Адӕймаджы йӕ цардӕмбал, йӕ бинонтӕй ныфс куы уа, уӕд ыл ницы фӕуӕлахиз уыдзӕн, ахиздзӕн цыфӕнды зындзинӕдты сӕрты дӕр. ӕмӕ уыцы стыр ныфс Артурӕн у йӕ бинойнаг Верӕ. Балӕвар ын кодта фырыхъулы хуызӕн ӕртӕ фырты: Руслан, Макъар ӕмӕ Арсены. Уыдон ӕй нӕ уадзынц йӕ сӕрмӕ худинаг ӕрхӕссын, уыдон ын дӕттынц ныфс ӕмӕ хъару, уыдон ӕй хонынц уӕлахизтӕм.
Верӕимӕ базонгӕ сты хӕрз ӕрыгонӕй. Артуры ӕфсадмӕ акодтой. Верӕ йӕм фенхъӕлмӕ каст. Ахуыр куы фӕцис, уӕд сӕ цард баиу кодтой ӕмӕ ныр 24 азы цӕрынц кӕрӕдзи ӕмбаргӕйӕ.
Артурӕн стыр аргъ кӕнынц йӕ хӕстон ӕмбӕлттӕ, уымӕн ӕмӕ йын тохы быдыры федтой йӕ ныфсхаст сӕрӕндзинад, ӕмбӕлттыл иузӕрдион ӕмӕ ӕнӕхин, сыгъдӕгзӕрдӕйӕ йӕхи кӕй равдыста, уый. Тохы быдыры алкӕмӕн дӕр ис фӕзилӕны нӕмттӕ. Артурмӕ дзырдтой фӕсномыг «Осетин»-ӕй, ӕмӕ йыл уый ӕвӕрдта уӕлдай хӕс.
Куыд зӕгъы, афтӕмӕй-иу ын йӕ фыд афтӕ дзырдта, хӕдзарӕй куы рахизай уынгмӕ, уӕд хӕссыс бинонты фарн, бинонты ӕгъдау, сыхбӕсты фарн ӕмӕ ӕгъдау, дарддӕр — хъӕубӕсты ӕмӕ республикӕйы, цы адӕмыхаттӕй дӕ, уыдоны фарн ӕмӕ ӕгъдау ӕмӕ сӕ ӕдзух хъуамӕ дарай дӕ зӕрдыл.
— Уыцы ныхӕстӕ хъуыды кӕнгӕйӕ, куыд хъуамӕ ӕрхастаин мӕ сӕрмӕ худинаг. Мӕ бинонтӕ, ме ‘ртӕ фырты, мӕ Ирыстон мӕнӕн ӕвӕрд уыдысты ӕппӕты бӕрзонддӕр, сыгъдӕгдӕр ран, ӕмӕ сыл къӕм абадын дӕр хъуамӕ ма бауадзон, худинаг нӕ, фӕлӕ. Уый мын баззад мӕ рагфыдӕлтӕй. ӕмӕ архайын сӕ фарн бахъахъхъӕныныл, — зӕгъы Артур.
Ӕмӕ йын ӕнтысгӕ дӕр кӕны. Аргъ ын кӕнынц, уарзынц ӕй йӕ райгуырӕн Ирыстоны дӕр. Ацы аз ӕй майы Дзӕуджыхъӕуы Уӕлахизы Парады архайынмӕ кадджын уавӕры хуымӕтӕджы нӕ фӕхуыдтой.
Йӕ риуӕй цӕхӕртӕ калынц бирӕ хӕрзиуджытӕ.
Ныртӕккӕ кӕд Ирыстоны ис ӕмӕ рӕстӕгӕй-рӕстӕгмӕ йӕхи фӕдзӕбӕх кӕны рычындоны, уӕддӕр Луганскы ‘рдыгӕй цы хӕстонты ныууагъта, уыдонӕн рӕстӕгӕй-рӕстӕгмӕ йӕ бирӕ ӕмбӕлттӕ, йе ‘фсымӕртӕ Алан ӕмӕ Сосланимӕ ӕрвитынц се ‘ххуысы хай. Йӕ цотӕн сӕ мадымад Цыбырты Людмилӕ дӕр кӕд пенсиисӕг, кусӕг дохтыр у, уӕддӕр йӕ мызды кӕцыдӕр хай иудадзыгдӕр арвиты сӕрмагонд операцийы архайджытӕн ӕххуысӕн. Афтӕ, сӕ фыдӕлты фарн хъахъхъӕнгӕйӕ, ӕнӕхъӕн бинонтӕй дӕр архайынц уӕлахиз тагъддӕр ӕрбахӕстӕг кӕныныл.
КАСАТЫ Батрадз
