Ирыстойнаг фæндырдзæгъдæг ссис æппæтуæрæсеон конкурс «Душа баяна»-йы лауреат. Томайты Алыксандр конкурсы кæронбæттæнмæ куы рацыд, уæд ацагъта Антонио Вивальдийы цикл «Афæдзы афонтæ»-й музыкалон композици «Зымæг». Фæндырыл афтæ дæсны цагъта, æмæ йыл жюрийы уæнгтæ сæ цæст æрæвæрдтой.
Алыксандр у Дзæу-джыхъæуы Гергиты Валерийы номыл культурæйы колледжы 4-æм курсы студент. Йæ ахуыргæнæг у Зæнджиаты Тамарæ.
Алыксандр йæхæдæг куыд зæгъы, уымæ гæсгæ иугыццыл йæ зæрдæ æхсайдта, конкурсмæ бирæтæ æрбацыдысты – 167 архайæджы нæ бæстæйы алы регионтæй. Иууылдæр сты иттæг, сæ фылдæр – Уæрæсейы раззагдæр уæлдæр музыкалон ахуыргæнæндæтты студенттæ.
«Душа баяна» у адæмон традицион культурæйы фестиваль. Архайынц дзы хистæр кары адæм æмæ сывæллæттæ дæр, куыд профессионалтæ, афтæ хæдахуыр артисттæ, солисттæ æмæ музыкалон къордтæ дæр. Уыдоны ’хсæн сты зарæггæнджытæ, алыхуызон инструменттыл чи цæгъды, ахæмтæ, хореографтæ, актертæ, аив дзырды дæснытæ æмæ артисттæ.
Алыксандрæн нæ зæрдæ зæгъы ноджы стырдæр сфæлдыстадон æнтыст-дзинæдтæ! Уæлахиз у алкæддæр!
(«Сапæ»)
