Кæд æмæ нырмæ Ижевскы горæт нæма бабæрæг кодтат, хæстæгдæр рæстæг уæ зæрды Удмуртийы Республикæмæ ацæуын нæй, сæ адæмы культурæ, нырыккон нывгæнджыты сфæлдыстад нæма базыдтат, уæд, æнæмæнг, æрбацæут равдыст «Новые горизонты»-мæ. Уый байгом Цæгат Ирыстоны Национ наукон чиныгдоны равдыстыты залы.
Равдыст саразæг, студийы разамонæг у Жаннæ Хорошавина, Удмуртийы паддзахадон университеты аивадон-графикон факультеты рауагъдон. Æрбацæуæг адæмæн радзырдта, сæ сконд «Хорошая студия», Ижевскы кæй кусы ныр 20 азы. Фылдæр æргом здахынц рæзгæ фæсивæдмæ, кæнынц сфæлдыстадон балцтæ, ома, ницавæр ерыстæ скæнынц сывæллæттæн, афтæмæй свæййынц студийы уæнгтæ. Æрбамбырд сæ кодтой Жаннæ Хорошавина æмæ йæ сæрыхицау Игорь Потин.
Студийы уæнгтæ фæс-тæдæр свæййынц аивадон æмæ архитектурон институтты студенттæ. Се ‘ппæт куыстытæ дæр скæнынц цæугæ пленэрты
руаджы, æхсызгонæй абалц кæнынц Уæрæсе æмæ Хæдбар Паддзахæдты Цæдисы республикæтæм. Афтæ зæгъæн ис, æмæ Прикамьейы æрдзон фæлгонц, Суздалы историон бæстыхæйттæ, Калининграды готикон архитектурæ æмæ йæ æвæджиауы æрдз, Зæронд Тбилисы мидисджын кæртытæ фыст æрцыдысты сфæлдыстадон балцыты рæстæг.
Фарон, махмæ, Цæгат Ирыстонмæ, пленэрон балцы ссыдысты Ижевскы «Хорошая студия»-йы ахуырдзаутæ, цардысты Куырттаты комы, Фыййагдоны поселочы. Уый фæстæ, 16 сентябры, Ижевскы байгом равдыст «Аланский серпантин». Ныр та ижевскаг ахуырдзаутæ сæ равдыст сластой Дзæуджыхъæумæ, рæгъмæ рахастой пастелæй, хуызджын кърандæстæй, акварелæй, фломастертæй, жетийы бындурыл конд нывтæ.
Зæрдæмæхъаргæ ныхæстимæ уазджытæ æмæ æрбацæуæг адæммæ фæсидтысты Цæгат Ирыстоны аивæдты сгуыхт архайæг Гæздæнты Зарæ, республикæйы Нывгæнджыты цæдисы сæрдар Мæргъиты Таймураз, сфæлдыстады иннæ архайджытæ. Сæ хатдзæгтæ æмæ хъуыдытæ ныффыстой Аргъгæндты чиныджы, равдыстой, удмуртаг æрыгон нывгæнджыты куыстытæй разы кæй сты, уый.
Татьянæ Шеходанова, авторы ист къамтæ
