Республикæйы социалон кусæндæтты цæргæйæ, къайад чи скодта, уыцы бинонтæн парти «Иугонд Уæрæсе» зæрдиаг арфæтæ ракодта Бинонтæ, уарзондзинад æмæ иузæрдиондзинады боны фæдыл. Акци арæзт æрцыд «Фидар бинонтæ», зæгъгæ, партион ацы проекты фæлгæты.
«Иумæйаг Уæрæсе»-йы Фарсхæцджыты æхсæнадон штаб, йемæ ма æппæтуæрæсеон æхсæнадон змæлд «Æнæниз Фыдыбæстæ» æмæ хæрзаудæн фонд «Быть добру» иумæ арфæ ракодтой, Ацæргæ адæймæгтæ æмæ инвалидты хæдзар-интернат «Забота»-йы цæргæйæ, къайад чи сарæзта, фондз ахæм бинонтæн. Уыдон радзырдтой, куыд базонгæ сты, къайад саразыны уынаффæ куыд рахастой æмæ, бинонтæ ба-
хъахъхъæнынæн цавæр сусæгдзинæдтæ зонынц, æппæт уыдæтты тыххæй.
Рæсугъд æнкъарæнтыл æфтауæг, æцæг уарзондзинады цæвиттон – Михаил æмæ Маринæ. Бинонтæ скодтой 2018 азы, Бинонтæ, уарзондзинад æмæ иузæрдиондзинады бæрæгбон куы уыд, уæд. Уæдæй абонмæ, ныр авд азы дæргъы Михаил кæсы йæ бинойнагмæ, зилы йæм. Ацы аз сбæрæг кодтой «æрхуы» чындзæхсæв. Уый фæдыл сын хæдзар-интернаты сарæзтой рæсугъд бæрæгбон, скодтой сын лæвæрттæ. Арфæйы ныхæстæ сын загътой республикæйы Парламенты депутат, «Иумæйаг Уæрæсейы Сылгоймæгты змæлд»-ы партион проекты координатор Дзгойты Иринæ æмæ партион проект «Фидар бинонтæ»-йы координатор Хъуысаты Амырхан.
– Социалон кусæндæтты чи цæры, уыцы адæмæн бæрæгбон скæнын у уæлдай ахсджиаг хъуыддаг, фылдæр ын аргъ кæнынц æмæ, адæм сæм се ‘ргом кæй здахынц, уый сын уæлдай зынаргъ у. Ахæм рæсугъд æмæ фидар бинонтæ æрыгæттæн дæр сты цæвиттойнаг æмæ фæзминаг, – загъта Хъуысаты Амырхан.
Бæрæг куыд у, афтæмæй бинонтыл аудын у «Иумæйаг Уæрæсе»-йы адæмон программæйы сæйраг фæзилæнтæй иу.
САНАТЫ Альбинæ
