Ивгъуыд къуыри нæ республикæйы Сæргълæууæг Сергей Меняйло радон хатт раныхас кодта Цæгат Ирыстоны Парламенты æмбырды. Бæстон æрлæу-уыд, регионы дарддæры æнæкъуылымпы размæцыдæн цы нысантæ ис, Хицауады размæ цы ахсджиаг хæстæ æмæ лыггæнинаг фарстатæ лæууы, уыдоныл. Стæй фæбæрæг кодта РЦИ-Аланийы Хицауады ивгъуыд азы бæрæггæнæнтæ æмæ сын бæлвырд амынддзинæдтæ радта социалон-экономикон фарстатæ зæрдæзæгъгæ хуызы лыг кæныны тыххæй.
РЦИ-Аланийы Сæргълæууæг йæ раныхасы сæрмагондæй æрлæууыд æнæниздзинад хъахъхъæнынады ахсджиаг фарстатыл дæр.
Фыццаградон æргом аздахын кæмæ хъæуы, ахæм къабаз æй схуыдта Сæргълæууæг. Уымæ гæсгæ бафæдзæхста Æнæниздзинад хъахъхъæнынады министрадæн, нæ республикæйы Арæзтад æмæ архитектурæйы министрадимæ иумæ, сбæлвырд кæнын, нæ рынчындæттæй, поликлиникæтæй бындурон цалцæггæнинаг кæцытæ сты, рацарæзты куыстытæ кæм хъæуы, уыдонæн аргъ скæнын, æнæниздзинад хъахъхъæнынады рацарæзтæн ног хуызы программæ бацæттæ кæнын, республикæйы Онкологон центр цæмæй фæзына, уымæн йæ проект æмæ арæзтадон
куыстытæн финансон æфтиæгтæ ссарынæн. Цæмæй сæ хъуыдытæ бацæттæ кæной, уый сын загъта. Уыимæ, æппæт хъæугæ медицинон ифтонггарзæй сифтонг кæнын алы район дæр. Сæйрагдæр та сын бахæс кодта, цæмæй сæ лæггад хæццæ кæна алы адæймагмæ дæр, хохæй-быдырмæ, уа хæрзхъæд æмæ æмæ афойнадыл.
РЦИ-Аланийы Сæргълæууæджы уынаффæтæ куыд æххæстгонд цæуынц, уый тыххæй журналисттимæ фембæлды рæстæг радзырдта республикæйы æнæниздзинад хъахъхъæнынады министр Тебиаты Сослан.
– Нæ размæ æвæрд хæстæ æххæст кæнынмæ æвæстиатæй бавнæлдтам. Ныридæгæн уал номхыгъды ис 44 объекты, цалцæггæнæн куыстытæм чи æнхъæлмæ кæсы, ахæмтæ. Сты, куыд фелсырон пункттæ, амбулаторитæ, афтæ, республикон нысаниуæг кæмæн ис, уыцы стационартæ дæр. Национ ног проект «Дæргъвæтин æмæ активон цард»-мæ бахастам 18 объекты. «Æнæниздзинад хъахъхъæнынады къабазы фыццаградон къæпхæн рацаразын», зæгъгæ, ацы федералон проекты архайгæйæ, ног хуызы рацараздзыстæм, фыццаг медикон-санитарон æххуыс чи кæны, уыцы
куыстуæтты бæстыхæйттæ. Уыцы программæйы бындурыл райсдзыстæм медицинон кусæнгæрзтæ 200 хуызы æмæ 22 сæрмагонд автомашинæйы, – загъта министр æмæ æвдисæнæн æрхаста Психиатрион æмæ Сывæллæтты республикон рынчындæттæ, онкодиспансер æмæ иннæтæ, бындурон цалцæг чи æрцæудзæн, уыдоны номхыгъд.
– Арæзтад æмæ архитектурæйы министрадимæ иумæ кусæм проекттыл.Уæрæсейы Æнæниздзинад хъахъхъæнынады министрады сты Республикон онкодиспансеры рацарæзты гæххæттытæ, æмæ йæ паддзахадон реестрмæ бахастой. Рагагъоммæйы нымадмæ гæсгæ куыстытæн бахъæудзæн иу миллиард сомы бæрц. Зæрдæ æмæ дадзинты низтæй, онкологийæ рынчынтæн афойнадыл сæ низыхатт раиртасынæн æлхæндзыс-тæм диагностикон ифтонггарз – МРТ, КТ, флюоро æмæ рентген аппараттæ.Ныфс нæ ис, республикæйы Сæргълæууæджы амынддзинæдтæ иууылдæр æххæстгонд кæй æрцæудзысты, уымæй, – загъта Тебиаты Сослан.
Гугкаты Жаннæ
