Цæгат Ирыстон зындгонд у йе ‘хсарджын историйæ, хъæздыг культурон бынтæй, хæдхуыз нывæфтыд æрдзæй, æмæ йæ уымæ гæсгæ туристтæ нымайынц цымыдисаг регионыл. Ныртæккæ адæмон æрмдæснытæн, амалиуæггæнджытæн феххуыс кæныны, культурон бынты объекттæ банывыл кæныны, туристон лæггæдтæ фæуæрæхдæр æмæ экономикæйы ацы къабазæн кадртæ цæттæ кæныны тыххæй бирæ мадзæлттæ арæзт цæуы.
Туристон индустри йæхæдæг та сси республикæ æмæ нæ бæстæйы инфраструктурæйы райрæзт æмæ социалон-экономикон авналæнтæ фæуæрæхдæр кæныны ахсджиаг рахæцæн. Уымæ гæсгæ регионы туристон индустрийы рæзтæн уавæртæ аразæг профессионалты архайдæн ис стыр ахадындзинад. Уыдонæй иу у Мæхæмæтты Петр – Сывæллæттæ æмæ фæсивæдон туризм æмæ экскурситы республикон центры директор. Йæ курдиат æмæ фæлтæрддзинады руаджы туризм Ирыстоны уæлдæр æмвæзадмæ схызт, уымæн æмæ æнтыстджынæй пайда кæны нырыккон инновацион технологитæй фæсивæдон хъомыладон куысты. Æмæ йын йæ архайдæн стыр аргъ скодтой – Петры сæвзæрстой Уæрæсейы Туристон индустрийы цæдисы Цæгат Ирыстоны регионалон минæварæй, æмæ йын уый фæдыл арфæ кæнæм.
Æрæджы Мæхæмæтты Петр, куыд нæ республикæйы делегат, архайдта XXI Уæрæсейы туриндустрийы цæдисы съезды Мæскуыйы, национ центр «Уæрæсе»-йы. Боны фæткы уыдысты регионалон инфраструктурæ фидардæр кæнын æмæ Уæрæсейæн фæсарæнты куыд цымыдисаг туристон здæхты цæсгом скæныны фарстатæ. Форумы ма ныхас цыд, туризмы рæзтæн чи фæахъаз уыдзæн, ахæм æндæр ахсджиаг фарстатыл. Фыццаг хатт съезды фæлгæты арæзт æрцыд Уæрæсейы Федерацийы Паддзахадон советы къамис æмæ Уæрæсейы туриндустрийы цæдисы иумæйаг æмбырд туризмы темæйыл. Специалисттæ лæмбынæг радзырдтой нæ бæстæйы æмæ фæсарæйнаг туризмы æдасдзинады фарстатæ нырыккон уагыл саразыны, къабазы цифровизаци æмæ паддзахадон æххуысы фарстатыл.
Мæхæмæтты Петр куыд зæгъы, афтæмæй регионты ‘хсæн бастдзинад æмæ кæрæдзийыл æууæндындзинадæн туризмы стыр ахадындзинад ис. «Мæнæн, куыд Уæрæсейы туриндустрийы цæдисы регионалон минæварæн, мæ хæс у æрмæст мæ фæлтæрддзинад æмæ нæ республикæйы хуыздæр гæнæнтæ бавдисын нæ, фæлæ Уæрæсейы иннæ субъекттæй ме ‘мкусджытимæ хæлар, æууæнкджын бастдзинæдтæ саразын. Ахæм мадзæлтты руаджы та махæн иумæйагæй нæ бон у туристон бизнес æмæ ног маршруттæн аккаг уавæртæ саразыныл бацархайын», – фæбæрæг кодта Петр. Съезды бакуыстой, туризмы къабазмæ инвестицитæ æрбаздахынæн æмæ лæггæдтæ фæхуыздæр кæнынæн чи фæпайда уыдзæн, ахæм ахсджиаг уынаффæтыл.
Иузагъдæй, Цæгат Ирыстон бæлццæттæ æмæ туристтæн, раздæрау, у цымыдисаг йæ алæмæты рæсугъд æрдз æмæ культурон традициты руаджы. Мæхæмæтты Петры хуызæн специалисттимæ та республикæ уæндон къахдзæфтæй размæ цæуы, йæ хъомыс тыхджындæр кæны Уæрæсейы туризмы картæйыл.
Альбинæ ХАНТ-МАГОМЕДОВА,
Сывæллæттæ æмæ
фæсивæды туризмы
республикон центры методист
