Рæзгæ фæлтæримæ кусын, арф зонындзинæдтæ сын дæттын, Фыдыбæстæйыл æнувыд уæвын сæ ахуыр кæнын у арфæйаг хъуыддаг. Ууыл зæрдиагæй архайынц ахуырады къабазы кусджытæ. Уыдоны фарсмæ кæддæриддæр æрбалæууынц æхсæнадон организациты минæвæрттæ, бынæттон хиуынаффæйады специалисттæ.
Хъахъхъæнæн-дзыллон мæйоны фæлгæты æрæ-джы лæгдзинады урок ацыд Комсомольскы астæуккаг скъолайы. Кадджын уазджытæ уыдысты Кировы районы ветеранты уынаффæдоны сæрдар Бедойты Феликс æмæ «Аланты Ныхас»-ы
районы хайады уынаффæдоны сæрдар Къубалты Солтан. Раст зæгъгæйæ, ацы
ахуырадон уагдоны æфсæддон-патриотон хъомылады куыст бæрзонд æмвæзадыл ис. Ууыл зæрдиагæй кусынц директор Кобесты Маринæ (историйы ахуыргæнæг), йæ хæдивæг Хъуылымбегты Ритæ, иннæ ахуыргæнджытæ. Фæлæ ног адæймæгты фæзынд, уыдоны раныхæстæ кæстæрты зæрдæты гуырын кæнынц ног æнкъарæнтæ, арфæйаг миниуджытæ.
— Махæн нæ иумæйаг сæйраг хæс у, цæмæй рæзгæ фæлтæр æнувыд уой Фыдыбæстæйыл, рæстудæй йæ уарзгæйæ, зоной æмæ аргъ кæной Райгуырæн
бæстæйы историйæн, — дзырдта Къубалты Солтан.
Уый фæстæ кадджын уазджытæ æрхастой, нæ фыдæлтæ цы лæгдзинад равдыстой 1941-1945 азты тугкалæн хæсты рæстæг, уый æвдисæнтæ. Дзырдтой, Ленинграды æрхъулайы рæстæг сахары цæрджытæ цы хъизæмæрттæ бавзæрс-той, фæлæ уæддæр сæ ныфс кæй нæ асаст æмæ кæй æууæндыдысты советон хицауадыл, Сырх Æфсадыл.
Иннæ ахæм, Кавказыл тохы рæстæг иу хатт ма бæлвырдæй æвдыст æрцыд, нæ фыдæлты хъæбатырдзинады традицитæ сæ бынаты кæй уыдысты, кæй цардысты сæ зонд æмæ зæрдæты.
Фыдыбæстæйы Стыр хæсты архайæг, фыссæг Илья Эренбург афтæ сидти Кавказ хъахъхъæнджытæм: «…уæ къухы айдагъ нефт, айдагъ хуымзæххытæ не сты — уæ къухы ис нæ зæххы сæрибардзинад. Сымах фрицтæн стондзыстут сæ зыд дзæмбытæ Кавказы сæрвæлтау! Райгуырæн бæстæйы сæрвæлтау! Сæрибары сæрвæлтау!..»
– Ленинград æмæ Кавказæй дарддæр карз хæстытæ цыдис Сталинграды бынмæ, Курскы къæлæты, Прибалтикæйы, Германы зæххыл, — дзырдтой æхсæнадон организацийы минæвæрттæ. Æмæ кæмдæриддæр сырхæфсæддонтæ, уыдонимæ ирыстойнæгтæ дæр, æвдыстой æнæбасæттондзинад, Райгуырæн бæстæйыл иузæрдиондзинад. Дæнцæгæн æрхастой Кировы районæй рацæуæг Советон Цæдисы Хъæбатыртæ Карсанты Хъазыбеджы, Милдзыхты Хадзымырзæйы, Александр Бондары, Моргуаты Бекы, сæдæгай хæстонты, кæцытæ хорзæхгонд æрцыдысты паддзахадон хæрзиуджытæй сæ лæгдзинады тыххæй.
Тынг лæмбынæг хъуыстой скъоладзаутæ хистæрты ныхасмæ. Æмæ уырнинаг у, ныры рæзгæ фæлтæр фыдæлты фарн æмæ кад дарддæр кæй ахæсдзысты, уый. Нæ адæмты басæттын никуы никæй бон баци. Уымæн ма иу хатт ирд æвдисæн у сæрмагонд æфсæддон операцийы архайджыты хъæбатырдзинад.
КЪУБАЛТЫ Аркади
