Дзæуджыхъæуы 15 августы байгом уыдзæн скульптор Соскъиты Владимиры куыстыты равдыст «Хæрдмæцыд» («Восхождение). Уый тыххæй йæ телеграм-каналы фехъусын кодта Тугъанты Махарбеджы номыл Аивадон музей.
«Скульптурон экспозицийы иу хай æвæрд æрцæудзæн Сабырдзинады фæзы æмæ суыдзæн горæты пейзажы иу хай. Сахары цæрджытæ æмæ уазджытæ Соскъиты Владимиры бронзæйæ конд фигурæтимæ баиу уыдзысты, горæты сæйраг уынг уырыссаг культурæйы зындгонд архайджытæ Булат Окуджава, Иосиф Бродский æмæ Гæздæнты Гайтоимæ æмрæнхъ æрлæугæйæ», – загъд ис хъусынгæнинаджы.
Ам ма зæгъын хъæуы, равдыст «Хæрдмæцыд» æнгом баст кæй у, æрæджы Мæскуыйы чи байгом, Нонкомформизмы музейы уыцы проектимæ (Надежда Брыкинайы галерей). Соскъиты Владимиры куыстытæ уым æвдыст цæуынц Надежда Брыкинайы нывгæнджытæ-шестидесятникты нывты æмбырдгондимæ. «Дыууæ музейы баиу сты, цæмæй нырыккон аивадуарзджыты базонгæ кæной, ХХ æнусы аивады размæцыдыл чи сахадыдта, советон нывкæнынады уыцы аивадон фæзынд – нонкомформизмимæ», загъд ис музейы хъусынгæнинаджы.
БУТАТЫ Азæмæт
