Горæтгæрон районы Октябрыхъæуы фыццæгæм спортивон скъолайы хъомылгæнинæгтæй бирæты нæмттæ сыгъзæрин дамгъæтæй фыст æрцыдысты республикон нæ, фæлæ ма суанг дунеон спорты историйы чиныджы. Уыцы традицитæ абон дæр сæфт не сты, дарддæр сæ хæццæ кæнынц, ам бирæ азты чи кусы, уыцы тренертæ.
Æрæджы сæ фарсмæ ‘рбалæууыд æрыгон специалист Кочиты Амур. Лæппу у, программæ «Хъæууон тренер»-æй фыццагдæр чи спайда кодта, уыдонæй иу. Амур разæнгардæй архайы сабиты сæ хъарутыл баууæндын кæныныл спорты руаджы, зонгæ сæ кæны хъæбысхæсты сусæгдзинæдтимæ, æнæвгъауæй сын хай кæны йæ зонындзинæдтæ æмæ фæлтæрддзинадæй. Сывæллæттæ стыр цымыдисдзинадимæ хъæбысхæсты ног приемты сæ хъарутæ ‘взарынц, æхсызгонæй цæуынц тренировкæтæм, фæтк халыны цаутæ не ‘руа-дзыныл архайынц æмæ цин кæнынц спорты сæ фыццаг уæлахизтыл.
Программæ «Хъæууон тренер»-ы архайджытæй алчидæр райсы иу милуан сомы. Сæйрагдæр та уый у, æмæ, нæ республикæйы хъæуты йæ руаджы дæсны специалисттæ кæй фæзынд, сывæллæттæн та – æмбæлгæ уавæртæ спорты алы хуызты архайынæн.
Фæбæрæг кæнын хъæуы уый, æмæ ныртæккæ дæр РЦИ-Аланийы Физикон культурæ æмæ спорты министрадмæ бадæттын æмбæлы курдиат программæйы архайынмæ. Ахæм гæнæн уыдзæн октябры кæронмæ.
