Гергиты Валери æмæ Мариинаг театры Симфонион оркестр архайдтой VIII Дунеон фестивалы «Мариинаг-Дзæуджыхъæу».
Ацы хатт фестиваль йæ арæнтæ фæпарахатдæр кодта æмæ Цæгат Ирыстоны арæнты сæрты ахызт: концерттæ ацыдысты канд Дзæуджыхъæуы нæ, фæлæ ма Цхинвалы, Налцыччы æмæ Минводы. Фестивалы архайыны тыххæй нæ республикæмæ уазæгуаты ссыдысты оперæйы солисттæ Хъуылаты Агуындæ (Уæрæсейы Стыр театр), Анна Кикнадзе, Бакури Каличава, Инара Козловская, Михаил Векуа æмæ Михаил Павлов, стæй ма инструменталисттæ Нарек Ахназарян (виолончель) æмæ Гергиты Абысал (фортепиано).
Фестиваль кадджын уавæры байгом Дзæуджыхъæуы Культурон центры Стыр залы (раздæры кинотеатр «Пате»-йы бæстыхайы). Архайдтой дзы Гергиты Валери æмæ Мариинаг театры Симфонион оркестр. Дыккаг концерт та уыд Мариинаг театры РЦИ-Аланийы Филиалы концертон залы. Дарддæр концерттæ арæзт æрцыдысты Цхинвалы, Налцыччы – Борис Темиркановы номыл Кæсæг-Балхъары паддзахадон филармонийы æмæ Минводы.
Дзæуджыхъæуы Культурон центры уыцы бонты фенæн уыд Республикæ Цæгат Ирыстон-Аланийы Мариинаг театры Филиалы дæсæм, юбилейон сезонимæ баст цымыдисаг сæрмагонд равдыст. Фестивалмæ æрбацæуæг адæмы равдыст базонгæ кодта театры архайды сæйрагдæр цаутимæ, фæскулисæты цардимæ, филиалы репертуары чи ис, уыцы оперæ æмæ балеты спектакльты кæмæй пайда кæнынц, ахæм театралон дзаума æмæ костюмтимæ.
Дунеон музыкалон фестиваль «МариинагДзæуджыхъæу» арæзт кæдæй цæуы, уæдæй нырмæ ссис Уæрæсейы Хуссары культурон царды æппæты зынгæдæр цау. Йæ архайджытæ алы азты уыдысты, сæ нæмттæ æппæт дунейыл кæмæн айхъуыстысты, ахæм музыканттæ æмæ аивадон коллективтæ.
Нæ уацхæссæг
