1 октябрæй нæ бæстæйы æппæт регионты райдыдтой фæззыгон æрсидты мадзæлттæ. Знон Дзæуджыхъæуы æфсæддон комиссарады кæртæй æфсадмæ афæндараст кодтой 25 æрыгон лæппуйы.
Мадзалмæ æрбацыдысты: РЦИ-Аланийы Десантникты цæдисы сæрдар Золойты Игорь, Фыдыбæстæ хъахъхъæнджытæй чи фæмард, уыцы бинонты Æппæтуæрæсейаг æхсæнадон организацийы регионалон хайады сæрдар Татьяна Днепровская, ирон адæмы Уæлдæр Советы сæрдары хæдивæг Азиаты Алыксандр, Ильинаг аргъуаны иерей фыд Дмитрий, нæ республикæйы Пысылмæтты управленийы минæвар Гобеты Батрадз, скъоладзаутæ æмæ ныййарджытæ.
Бæрæгбон райдыдта фæзмæ Уæрæсейы Федераци æмæ РЦИ-Аланийы тырысатæ рахæссынæй. Уый фæстæ сиддонтæн фæндарасты ныхæстæ загътой йæ архайджытæ. Æнæзæрдæхудтæй службæ кæныны тыххæй лæппутæм фæсидтис РЦИ-Аланийы æфсæддон комиссар Владимир Скоморох:
– Абон цы ног фæлтæр æрвитæм æфсæддон службæмæ, уыдон фæфылдæр кæндзысты нæ бæстæйы Хуссайраг федералон зылды æфсæддон хæйттæ. Нæ республикæйы æфсæддон комиссарады номæй уын арфæ кæнын уæ службæйы райдианы фæдыл, мæ зæрдæ уын зæгъы, фыццаджыдæр, æхсардзинад, быхсондзинад æмæ, цыфæнды уавæрты дæр уæ бон фидар лæууын куыд уа. Æфсæддон хæс æххæст кæнын æнцон нæу, фæлæ нæ республикæ кæддæриддæр намысджын хæстонтæй сæрыстыр уыд. Æдзухдæр уæ зæрдыл дарут уый, æмæ уæ мыггæгтæ, уæ бинонты ном макуы фæчъизи кæнут, – загъта æфсæддон комиссар.
Сиддонтæн йæ ныстуаны ныхæстæ загъта Золойты Игорь дæр.
– Нæ фидæны хъахъхъæнджытæ! Рох уæ ма уæд, цавæр республикæйы минæвæрттæ стут, уый æмæ уын бар нæй æгоммæгæсы миниуджытæй уæ мыггæгты кад дæлæмæ æруадзынæн, уый хъуыды кæнут. Уæ хистæртæ уæ арвыстой уе ‘фсæддон хæс сæххæст кæнынмæ, æмæ дзæбæхæй уæ хæдзæрттæм æрыздæхут, – загъта Золойы-фырт.
Æрсидты ма раныхас кодта Татьяна Днепровская дæр. Сылгоймагæн йæ хъæбул, хъæбатыр хæстон, фесæфт, Цæцæны 90-æм азты хæсты зынг куы ссыгъд, уæд. Фæлæ ныййарæг фидар фæлæууыд, æмбары йæ, йæ фырт худинаджы номы бæсты мæлæт кæй равзæрста, уый.
– Зынаргъ хъæбултæ, сымах фæфылдæр кæндзыстут нæ Фыдыбæстæ хъахъхъæнджыты рæнхъытæ. Уый хуымæтæг хæс нæу. Нæ хистæр фæлтæр абон «уырыссаг дуне» хъахъхъæнынц сæрмагонд æфсæддон операцийы, сымах та, ам – нæхи Хуссайраг федералон зылды. Уæ службæйæ дæр бирæ аразгæ у, цæмæй нæ республикæ æмæ Цæгат Кавказы сабырдзинад уа, уымæн. Æфсæддон командæгæнынады коммæ кæсут, сыгъдæгзæрдæйæ æххæст кæнут æфсæддон Уставы нысантæ, æмæ уæ царды алцыдæр хорз уыдзæн. Мах, канд ныййарджытæ нæ, фæлæ нæ республикæйы цæрджытæ, иууылдæр сæрыстыр вæййæм, уæ хорз хабæртты тыххæй нæм арфæйы фыстæджытæ командæгæнынадæй куы æрбацæуы, уæд. Дзæбæхæй фæстæмæ сæмбæлут уæ хæдзæрттыл, – раарфæ кодта сиддонтæн Татьяна Днепровская.
Æфсæддон комиссарады фæзы сиддонтæм æнхъæлмæ кастысты автобустæ. Зындгонд марш «Прощание славянки»-йы зæлтæм сиддонтæ араст кодтой æфсадмæ.
Саутæты Тамилæ,
къамтæ систа Татьяна ШЕХОДАНОВА
