Тауаситы Сослæнбеджы номыл Сывæллæтты аивæдты скъолайы бындурыл байгом креативон индустриты скъола. Йæ байгом кæныны кадджын бæрæгбоны архайдта РЦИ-Аланийы Парламенты Сæрдар ТУСКЪАТЫ Таймураз.
Ацы ног скъола у, æнустæ кæуыл цæуы, уыцы рагон æгъдæуттæ æмæ фидæны технологитæ чи баиу кодта, ахæм ахуырадон проект. Сывæллæтты аивæдты скъолайæн бындур æвæрд æрцыд 1920 азы, æмæ нымад у ацы къабазы Уæрæсейы Хуссары раззагдæр ахуыргæнæндæттæй иуыл. Ныр та ма ссис цифрон æгъдауæй сфæлдыстад райрæзын кæныны фæзуат. Скъолайы рагон бæстыхæйтты æрбынæттон сты дизайн æмæ анимацийы, ЗD-графикæйы æмæ æндæр нырыккон технологиты студитæ.
2025 азы Сывæллæтты аивæдты скъола æнтыстджынæй ацыд конкурсы æвзæрстытæ, æмæ йын уымæ гæсгæ, лæвæрд æрцыд субсиди скъола саразыны тыххæй. Ахæм федералон æххуысы фæрцы скъола æрцыд бындурон рацарæзт æмæ йын балхæдтой бæрзонд технологитыл арæзт нырыккондæр ифтонггæрзтæ.
– Тауаситы Сослæнбеджы номыл Сывæллæтты аивæдты скъола у Дзæуджыхъæуы истори. Ацы ранæй се сфæлдыстадон фæндаг райдыдтой бирæ курдиатджын адæймæгтæ. Æмæ ныр йæ бындурыл ног скъола кæй гом кæны, уый ног фадæттæ дæтты нæ кæстæртæн, цæмæй аивæдты ирон скъолайы традицитæ адарддæр кæной, уый тыххæй, – загъта Тускъаты Таймураз.
Креативон индустриты скъолайы фыццаг ахуыргæнинæгтæ систы 12-17-аздзыд 80 ахуырдзауы, сæ ахуыр уыдон райдыдтой ацы аз 1 сентябры. Тауаситы Сослæнбеджы номыл Сывæллæтты аивæдты скъолайы директор Быдтаты Азæйы ныхасмæ гæсгæ, иннæ ахуыры аз сывæллæтты нымæц фæфылдæр уыдзæн, бафтдзæн ма сыл курдиатджын ног фæсивæд.
ДЕДЕГКАТЫ Зæлинæ
