Феврал у, уалдзӕг йӕ бартӕ исын куы райдайы, уыцы мӕй. Уымӕ гӕсгӕ йӕ нымайынц ӕппӕтӕй раив-баивгӕдӕрыл. Уӕвӕн ис, ӕмӕ уалдзӕджы хуызӕн хъарм бонтӕ цӕхгӕр аивой асӕст ӕмӕ уазал боныхъӕдмӕ (уыцы ӕууӕл дзурӕг у, адӕм ӕй «тызмӕг мӕй» дзӕгъӕлы кӕй нӕ хонынц, ууыл).
Арӕх февралы уӕлдӕфы рӕстӕмбис температурӕ вӕййы 2-4 градусы уазал. Ростовы гидрометцентры рагагъоммӕйы бӕрӕггӕнӕнтӕм гӕсгӕ, ацы аз, Цӕгат Кавказы федералон зылды уӕлдӕфы температурӕ уыдзӕн нормӕйӕ уӕлдӕр.
Ӕхсӕвы, уӕлдӕфы температурӕ 1-3 градусы хъармӕй ӕрхиздзӕн 2-4 градусы уазалмӕ. Бонӕй уӕлдӕфы температурӕ цӕхгӕр ивдзӕн. (Уӕрӕсейы европӕйаг хайы хуссайраг районты афтӕ арӕх вӕййы). Арӕх уӕлдӕфы температурӕ 0-6 градусы уазалӕй схиздзӕн 2-8 градусы хъарммӕ, иуӕй-иу бонты та (хуссарӕй хъарм дымгӕ куы кӕна, уӕд) — 14-20 градусы хъарммӕ.
Бирӕ азты бӕрӕггӕнӕнтӕм гӕсгӕ, феврал ӕппӕтӕй уазалдӕр уыд 1954 азы — 13 градусы уазал, ӕппӕтӕй хъармдӕр та 2002 азы — 5 градусы хъарм.
Арӕх мӕймӕ рауары 30-35 миллиметры. Ацы аз дӕр рауардзӕн нормӕйы бӕрц, науӕд та — чысыл фылдӕр. 7-9 боны дӕргъы уардзӕн къӕвда, сӕлӕф ӕмӕ мит (хатгай — тыхуарынтӕ). Рӕстӕггай баддзӕн мигъ, фӕндӕгтӕ уыдзысты бырынцъаг.
Аллӕ Филимонова,
инженер-синоптик
