Ахуырады кусджыты зонындзинӕдтӕ бӕрзонддӕр кӕнӕн институты цы ӕмбырд уыд, уым кадджын уавӕры байгом кодтой профессион дӕсныдзинады республикон конкурстӕ «Азы хуыздӕр ахуыргӕнӕг» ӕмӕ «Педагогон дебют».
Кадджын ӕмбырды рӕстӕг куыд фехъусын кодтой, афтӕмӕй профессион дӕсныдзинады уыцы ерысты архайыны фӕдыл куырдиӕттӕ ӕрбалӕвӕрдтой республикӕйы ӕппӕт районты минӕвӕрттӕ дӕр. Уыдонӕй 52 адӕймаджы сӕ арӕхстдзинад ӕвдисдзысты «Азы хуыздӕр ахуыргӕнӕджы» конкурсы, 13 адӕймаджы та — «Педагогон дебют»-ы.
Ӕмбырды раныхас кодта ӕмӕ конкурсы архайджытӕн арфӕ ракодта Цӕгат Ирыстоны ахуырад ӕмӕ наукӕйы министр Людмилӕ Башарина.
«Фӕстаг рӕстӕг фылдӕр ӕргом здӕхт цӕуы ахуырады кусджыты профессион дӕсныдзинады конкурстӕ аразыны хъуыддагмӕ. Министрады специалисттӕ бацархайдтой, цӕмӕй ацы ерыстӕ ацӕуой бӕрзонд организацион ӕмвӕзадыл. Дызӕрдыг нӕ кӕнын, конкурсы архайджытӕ сӕ зонындзинӕдтӕ ӕмӕ профессион дӕсныдзинад ирдӕй кӕй равдисдзысты, ууыл», — загъта Людмилӕ Башарина.
Конкурсы архайджытӕ сӕ хӕслӕвӕрдтӕ — гом уроктӕ, мастер-класстӕ ӕмӕ иннӕ мадзӕлттӕ ӕххӕст кӕндзысты цалдӕр дзӕуджыхъӕуккаг скъолайы бӕстыхӕйтты. Уыимӕ, ӕппӕт ерыстӕ дӕр ӕвдыст цӕудзысты онлайн-трансляцийы фӕрцы.
Уыимӕ, рагагъоммӕ цы уынаффӕ рахастӕуыд, уымӕ гӕсгӕ, «Азы хуыздӕр ахуыргӕнӕджы» конкурсы уӕлахиздзауӕн хӕрзиуӕджы хуызы балӕвар кӕндзысты фатер, «Педагогон дебют»-ы уӕлахиздзауӕн та ратдзысты ӕхцайы приз. Уымӕй уӕлдай, дыууӕ конкурсы республикон къӕпхӕны уӕлахиздзаутӕ республикӕйы кад хъахъхъӕндзысты профессион дӕсыдзинады ӕппӕтуӕрӕсеон ерысты.
РЦИ-Аланийы Ахуырад ӕмӕ наукӕйы министрады пресс-службӕйы ныхасмӕ гӕсгӕ, республикон конкурсты уӕлахиздзаутӕ ӕмӕ лауреаттӕ сбӕрӕг уыдзысты 29 февралы.
Нӕ уацхӕссӕг
