Уыдис РЦИ-Аланийы муниципалон скондты правленийы советы ӕмбырд. Ныхас цыдис районты социалон-экономикон фарстытыл ӕмӕ ӕхсӕнадон царды уавӕртыл. Ӕмбырд амыдта, правленийы советы сӕрдар Нӕкуысаты Барис. Боны фӕткмӕ хаст ӕрцыд цыппӕрдӕс фарсты. Уыдоны тыххӕй бӕлвырд докладтӕ скодтой советы уӕнгтӕ. Район архайы ӕхсӕз нацпроекты ӕмӕ ӕххӕст кӕны паддзахадон программӕтӕ.
— Алагиры районы ӕххӕстгонд цӕуынц национ проекттӕ: «Демографи», «Ӕнӕнӕниздзинад», «Ахуырад», «Культурӕ», «Цӕрӕнуӕттӕ», «Чысыл ӕмӕ рӕстӕмбис амалхъомады нысантӕ». Проект «Демографи»-йы бындурыл районы ӕрыгон бинонтӕн ӕххуыс цӕуы ахӕм уагӕвӕрдмӕ гӕсгӕ: фыццаг ӕмӕ дыккаг сывӕллоны райгуырдӕн 59 бинонтӕн иумӕйаг нымӕцӕй ӕхца дихгонд ӕрцыд 20 милуан сомы. Ӕртыккаг сывӕллоны фӕстӕ та 210 бинонтӕн дихгонд ӕрцыд 25,5 милуан сомы.
Проект «Цӕрӕнуӕттӕ»-йы бындурыл районы 58 бинонтӕ райстой цӕрӕнуӕтты сертификаттӕ. Ацы проекты фӕрцы цӕрӕнуӕтты сертификаттӕ лӕвӕрд ӕрцыд ӕхсӕз ӕрыгон бинонтӕн. Проект «Хъӕууон фӕзуӕтты рӕзт»-ы фӕлгӕты авд бинонтӕн социалон фиддонты ӕвдисӕндартӕ лӕвӕрд ӕрцыд цӕрӕнуӕттӕ самал кӕнынӕн. Паддзахадон программӕ «Физкультурӕ ӕмӕ спорты рӕзт»-ы бындурыл та 2019 азы Мызуры поселочы сарӕзтам бирӕкъабазджын хъазӕн фӕз. 2020 азы ма Алагиры ӕмӕ Црауы ноджыдӕр арӕзт ӕрцӕудзӕн дыууӕ ахӕм фӕзы,
Нацпроект «Ахуырад»-ы Алагиры район архайы ӕртӕ проекты: «Нырыккон скъола», «Сывӕллоны ӕнтыст» ӕмӕ «Нымӕцон-ахуырадон уаг». Бирӕ ногдзинӕдтӕ фӕзынд районы скъолаты. Хорз рӕзы районы чысыл ӕмӕ рӕстӕмбис амалхъомад дӕр. Ивгъуыд аз нӕ хъӕууонхӕдзарадон къордтӕн сӕ къухы бафтыд ӕнтыстдзинӕдтӕ. Халсарты авд хӕдзарады райстой гранттӕ, ӕмӕ уый фӕрцы зӕхкусджыты фадӕттӕ рӕзынц,– загъта Алагиры районы бынӕттон хиуынаффӕйады администрацийы сӕргълӕууӕг Бутаты Арсен.
Районы сӕргълӕууӕг ма фӕнысан кодта, Куырттаты ком туристон ӕмӕ рекреацион зонӕ кӕй у, ӕмӕ комы рӕзтӕн комплексон программӕ ӕмӕ кусӕг къордтӕ саразын кӕй хъӕуы, уый дӕр.
РЦИ-Аланийы архитектурӕ ӕмӕ горӕттӕаразӕн комитеты сӕрдар Цӕллагты Алыксандр раныхас кодта, федералон проект «Формирование комфортной городской среды», зӕгъгӕ, ахсджиаг фарстайыл.
– Бирӕ ӕрмӕджытӕ дзуапп нал дӕттынц нырыккон царды ӕхсӕнадон объектты арӕзтадӕн. Бацӕттӕ кодтам ног проекттӕ ӕмӕ сӕ хӕстӕгдӕр рӕстӕг нӕ республикӕйы разамындӕн бавдисдзыстӕм. Иннӕ лыггӕнинаг фарст та у, историон объекттӕн знаггад чи хӕссы, вандалтӕ кӕй хонӕм, уыдонимӕ закъоны бындурыл тох кӕнын, ивар сын фидын кӕнын, — загъта Цӕллагты Алыксандр.
Муниципалон скондты правленийы советы ӕмбырды ныхас цыдис ӕнахъом сывӕллӕтты социалон царды уавӕртыл дӕр. Доклад бацӕттӕ кодта РЦИ-Аланийы Мидхъуыддӕгты министрады сывӕллӕтты хъуыддӕгты фӕдыл хайады сӕргълӕууӕг Гаянэ Петросова. Куыд радзырдта, афтӕмӕй 2019 азы фӕсивӕд сарӕзтой 78 фыдракӕнды.
— Нӕ хайад йӕ цӕст дары, министрады хыгъды чи ис, уыцы сывӕллӕттӕм. Профилактикон куыст кӕнӕм семӕ ӕмӕ сӕ ныййарджытимӕ. Ацы аз сараздзыстӕм ӕхсӕнадон хъахъхъӕнджыты къорд. Уыдоны фӕрцы нын хорз фадӕттӕ фӕзындзӕн сывӕллӕтты фыдракӕндтӕ аразынӕй бахизынӕн. Уыцы фыдракӕндтӕ вӕййынц давды цаутӕ, рӕзгӕ фӕлтӕр ма свӕййынц социалон хызты амӕттӕгтӕ дӕр, — загъта Гаянэ Петросова.
Мидхъуыддӕгты оргӕнты кусӕг ма загъта, сывӕллӕтты фыдракӕндтӕй бахизынӕн ног проекттӕ кӕй цӕттӕ кӕнынц, уый тыххӕй.
Нӕ республикӕйы гидротехникон арӕзтӕдтӕ уалдзӕджы донивылдтытӕм куыд цӕттӕ сты, уый тыххӕй раныхас кодта ӕнӕнхъӕлӕджы уавӕрты граждайнаг хъахъхъӕнынады управленийы хицау ӕлборты Анатоли.
Куыд загъта, афтӕмӕй нӕ республикӕйы арӕзт ӕрцыдысты донивылдтытӕй бахизыны мадзӕлттӕ.
– Ӕнӕнхъӕлӕджы уавӕрты ацы фарст банывыл кӕныны хъуыддагӕн нӕм ис сӕрмагонд къорд – 1662 адӕймаджы ӕмӕ сӕрмагонд техникӕ – 644 иуӕджы. Хъуыддаг уый мидӕг ис, ӕмӕ гидротехникон арӕзтӕдтӕ сты ӕдзӕллаг уавӕры, ӕмӕ сӕ банывыл кӕнынӕн управленимӕ ӕхцайы фӕрӕзтӕ нӕй, — загъта ӕлборы-фырт.
Нӕкуысаты Барис ацы фарст йӕхимӕ фӕнысан кодта ӕмӕ загъта, нӕ республикӕйы Парламенты ӕмбырдмӕ йӕ кӕй бахӕсдзӕн.
Советы уӕнгтӕ ныхас кодтой зӕххытӕ ӕмӕ нотариалон уагӕвӕрдты фарстытыл дӕр. Ӕмгуыстады бадзырдтӕ бафыстой нӕ республикӕйы Юстицийы министрад ӕмӕ Центрон ӕвзарӕн къамисимӕ.
Саутӕты Тамилӕ
