Рӕсугъд ӕмӕ фӕрнӕйдзаг у Ирыстоны зӕхх. Йӕ урссӕр хӕхтӕ, сырсыргӕнаг ӕхсӕрдзӕнтӕ, абухгӕ хӕххон сыгъдӕг цӕугӕдӕттӕ, бӕрзонд цъӕх арвы риуыл цӕргӕсты тахт… Уыцы алӕмӕты нывтӕм кӕсгӕйӕ адӕймаджы риу куыд нӕ байдзаг уыдзӕн уӕлмонц ӕнкъарӕнтӕй, куыд нӕ дзы райгуырдзӕн удцырын…
Хъӕздыг у Ирыстоны зӕхх хорз ӕмӕ суинаг кӕстӕртӕй. Хуыцау ӕвӕджиауы курдиат рӕдауӕй кӕмӕн бахай кодта, уыдонӕй иу у Дзӕуджыхъӕуы 5-ӕм гимназы цыппӕрӕм къласы ахуырдзау Басаты Оскар.
Уый бирӕ уарзы классикон музыкӕ. Фондз азы дӕр ыл нӕма цыд, афтӕ ахуыр кӕнынмӕ бацыд Дзӕуджыхъӕуы сывӕллӕтты аивӕдты скъоламӕ фортепьянойы къласмӕ. Музыкалон сусӕгдзинӕдтӕ йын амоны РЦИ-Аланийы культурӕйы сгуыхт кусӕг Иринӕ Никитина.
Оскар архайы нӕ бӕстӕйы бирӕ алыхуызон музыкалон конкурсты. Ныртӕккӕ йыл 10 азы йеддӕмӕ нӕма цӕуы, фӕлӕ йӕ музыкалон ӕвӕрӕны цы бирӕ дипломтӕ ӕмӕ Кады гӕххӕттытӕ ис, уыдонмӕ зындгонд артисттӕ дӕр бахӕлӕг кӕндзысты. Не ‘мзӕххон ирон лӕппу у уӕрӕсейаг музыкалон фестивалты премиты лауреат ӕмӕ алыхуызон кадджын музыкалон конкурсты уӕлахиздзау.
Оскар бирӕ уарзы дунеон композиторты музыкалон уацмыстӕ, фӕлӕ йӕ зӕрдӕйы уӕлдай арфдӕр бынат бацахста Махъоты Ацӕмӕзы музыкӕ, исы дзы стыр ӕхсызгондзинад. Уый у йӕ уарзондӕр композитортӕй иу.
Оскарыл йӕ цӕст ӕрӕвӕрдта УФ-йы адӕмон артисткӕ Гергиты Ларисӕ. Суинаг курдиатджын музыкантӕн алывӕрсыг ӕххуыс кӕны, йӕ арм ыл дары.
ХЪОЙБАЙТЫ Галинӕ
