Æрæджы мæ уарзон газет «Рæстдзинад»-ы бакастæн йæ сæйраг редактор Хозиты Барисы æрмæг. Ныхас дзы цыди, газет рафыссыны хъуыддаг цы уавæры ис, ууыл. Æз æй кæсын æртын азæй фылдæр. Мæнмæ гæсгæ, йæ алы номыры дæр царды асджиагдæр хъуыддæгтыл вæййы тынг хъæугæ æрмæджытæ. Нæ адæм газет кæсынц цымыдисæй, редакцимæ дзурынц сæ тыхстаг фæрстытимæ. Уый та алкæмæн дæр æххуыс кæны, йæ гæнæнтæ куыд сты, афтæ.
Фæлæ мæ дисы бафтыдта ахæм хабар. Нæ республикæйы ирон адæм цæры 500 минæй фылдæр. Уыдонæй фондз мины дæр нæ исы газет «Рæстдзинад». Ацы нымæц Советон дуджы уыдис бирæ фылдæр. Æз ма йæ хорз хъуыды кæнын, Гуырдзыстоны дæрддзæф ирон хъæуты цæрджытæ куыд истой газет «Советон Ирыстон», уый.
Ацы аз, 15 январы, газет «Рæстдзинад»-ы уыдис педагогон фæллойы ветеран Уататы Азæйы æрмæг. Уый дæр сагъæсгæнгæ дзырдта ирон æвзаджы абоны уавæры тыххæй. Æмæ нæ иунæг æрвылбонон газет «Рæстдзинад» схуыдта «Ирон æвзаджы удылхæцæг». Газет æрмæстдæр 5000 мин хæдзары кæй рафыссынц, уый та нымайы худинагыл. Æмæ тынг раст зæгъы. Цæгат Ирыстоны мингай газеттæй ирон æвзагыл цæуы æрмæстдæр иу газет — «Рæстдзинад». Æмæ йæ кæд ирæттæй исчи нæ кæсы, уæд сæхи ирæттæ цы цæсгомæй хонынц?
Æрæджы ма «Рæстдзинад»-ы номыртæй иуы бакастæн фæллойы ветеран Къæбысты Отары æрмæг «Мадæлон æвзаг мæ зæрдæйы арф бынат ахсы». Уым автор зæгъы: «Бæрæг у, нæ адæмæн сæ мадæлон æвзаг сæ зæрдæты арф бынат кæй ахсы, уый. Уырны мæ, дарддæр дæр, йæ рухс сомбоныл æмхъаруйæ архайгæйæ, йæ уавæр хорз кæй уыдзæн, уый». Нæ горæты цардмæ кæсгæйæ мæ ацы ныхæстæ нæ уырнынц, уымæн æмæ дзы арæхдæр хъусын æндæр æвзæгты мыртæ. Ирон ныхас дзы искуы иу хатт куы фехъусын, уæд мын вæййы тынг æхсызгон. Иронау чи фæдзуры, уыдонæн ма, æрыгонæй, карджынæй, арфæтæ дæр ракæнын.
Ныры дуджы ирæттæй бирæтæ не ‘мбарынц, нæ царды ирон æвзаг куыд ахсджиаг у, уый. Йæ тавс сын Елхоты онг йеддæмæ нæу. Уыдонæн та зæгъдзынæн афтæ: ирон æвзаг у, Хуыцауæй нын стыр хорзæхæн цы агургæ æмæ нæаргæ хæзна лæвæрд æрцыд, уый. Йæ фæрцы мах стæм аланты фæдонтæ. Не ‘взаджы ис нæ истори, нæ цардыуаг, не ‘гъдау æмæ нæ культурæ.
Афтæмæй, нырмæ иронау кæсын æмæ фыссын чи нæ зоны, уыцы ирæттæ газет «Рæстдзинад» куы рафыссой, куы йæ кæсой, уæд сæ миддунейæ фæуыдзысты рæсугъддæр, сæ зондæй — кæрдагдæр, зæрдæйæ — æнкъарагдæр!
Мæ фыстæджы кæрон сидын Æппæтдунеон æхсæнадон змæлд «Иры Стыр Ныхас»-ы сæрдар Кучиты Русланмæ. Ацы организацийы ис Ирыстоны мыггæгты совет. Йæ сæргълæууæг у Æгкацаты Вячеслав. Уый советы уæнгтæй сæ алкæмæн дæр куы бабар кæнид, æмæ дзы чи кæцы мыггаджы минæвар у, уыдонæй алчидæр газет «Рæстдзинад» рафыссыныл куы бацархаид, уæд уаид хорз. Нæхи ирон газет «Рæстдзинад»-ы тиражыл нæхæдæг хъуамæ батыхсæм, æндæр нæм фæрсырдыгæй ничи æрбацæудзæн æмæ нын æй нæ фæфылдæр кæндзæн!
ХУЫБЕЖТЫ Шалва,
ЦИПУ-йы профессор
