Форум «Машук»-ы радон сменæйы архайджытæ цы проектыл бакуыстой, уымæн Президенты грантты фондæй лæвæрд æрцæудзæн æххуыс. Йæ нысан у Кавказ æмæ Уæрæсейы Хуссары фæсивæды ‘ргом ацы регионты цæрæг адæмы истори æмæ культурæмæ раздахын.
Регионты ‘хсæн фыццаг конкурс «Зонын Кавказ» уыдзæн ацы аз уалдзæджы Хуссайраг æмæ Цæгат Кавказы федералон зылдты. Президенты грантты фонд рамбулæг проектæн йæ саразæг у фонд «Нæ бæстæ», кусгæ та йыл фарон августы бакодтой форум «Машук»-ы сменæ «Æз — сæрхъуызой»-ы архайджытæ æмæ эксперттæ. Сменæйы амидингæнæг уыд Президенты платформæ «Уæрæсе — бирæ гæнæнты бæстæ».
Бахъуыд афæдзы æмбисæй къаддæр, цæмæй конкурс саразыны хъуыдыйæ рауайа регионалон стыр цау.
— Проект у хъæугæ, уымæ гæсгæ йæ фарс рахæцыдысты Уæрæсейы Хуссар зылды уæлдæр ахуыргæнæндæттæ се ‘ппæт дæр, стæй Президенты платформæ «Уæрæсе — бирæ гæнæнты бæстæ»-йы эксперттæ. Æрыгон ахуыргæндты ‘ргом Кавказ æмæ йæ цæрджыты æгъдæуттæ æмæ традицитæ иртасынмæ здахын у тынг ахсджиаг хъуыддаг. Кавказы цы лыггæнинаг фарстытæ ис, уыдон геополитикон, геоэкономикон æмæ культурон æгъдауæй сты ахсджиаг Уæрæсейæн, йæ национ æдасдзинадæн, бизнес рæзын кæнынæн, æрдзон фæрæзтæй дзы ноджы хуыздæр пайда кæнынæн, — зæгъы фонды минæвар Антон Сериков.
Йæ хъуыдымæ гæсгæ, Кавказы лыггæнинаг фарстыты фæдыл дæсны специалисттæ бацæттæ кæнын къухы нæ бафтдзæн æнæ информацион æххуысæй æмæ хуыддагмæ фæсивæды æргом æнæ раздахгæйæ.
Регионалон иртасæнты фонд «Нæ бæстæ»-йы генералон директор Дмитрий Садко куыд фехъусын кодта, афтæмæй конкурс арæзт уыдзæн дыууæ къæпхæнæй. Фыццаг уыдзæн фæсаууонмæ тестты хуызы, фæлварæнтæ баст уыдзысты Кавказы историимæ æмæ йæ адæмы традицитæ æмæ æгъдæуттимæ.
— Нæ зæрдæ дарæм, конкурсы фыццаг къæпхæны кæй архайдзысты Цæгат Кавказ æмæ Хуссайраг федералон зылдты уæлдæр ахуыргæнæндæтты студенттæ. Уыдонæй 50 рацæудзысты дыккаг къæпхæнмæ, уый уыдзæн Пятигорскы ацы аз майы, — загъта Дмитрий Садко.
Конкурс саразджытæ сæ зæрдæ дарынц, йæ фæрцы æрыгæттæ сæ зонындзинæдтæ кæй фæфылдæр кæндзысты, стæй ма кæй сцымыдис уыдзысты сæ Райгуырæн бæстæйы культурæ, æгъдæуттæ æмæ традицитæ базонынмæ.
Нæ уацхæссæг
