Цӕгат Ирыстоны Хицауады Сӕрдары фыццаг хӕдивӕг Сӕбӕтхъуаты ӕхсарбегӕн фембӕлд уыд дзулфыцӕг кусӕндӕтты разамонджытимӕ. Фембӕлды архайджытӕ ӕрдзырдтой, къабаз къуырцдзӕвӕнӕй куыд ракӕнӕн ис, ууыл.
Дзулфыцджытӕ Хицауады Сӕрдары хӕдивӕджы ӕргом аздӕхтой бирӕ ахсджиаг лыггӕнинаг фарстытӕм. Сӕ ныхасмӕ гӕсгӕ, ссады аргъыл зынгӕ бафтыд, рӕзынц энергетикон фӕрӕзты ӕргътӕ дӕр. Уыцы ӕууӕлты аххосӕй сырӕзт дзулы рауагъды аргъ дӕр. Амалхъомтӕ куыд зӕгъынц, ахӕм уавӕрты дзулӕн йӕхи аргъыл дӕр бафтыдтой.
Куыстуӕтты разамонджытӕм лӕмбынӕг байхъусгӕйӕ, Сӕбӕтхъуаты ӕхсарбег куыд фӕнысан кодта, афтӕмӕй ацы продукт уӕлдай ахсджиаг у, йӕ аргъы рӕзт фӕзындзӕн республикӕйы ӕппӕт цӕрджытыл дӕр. Уымӕ гӕсгӕ, ӕппӕт уынаффӕтӕ дӕр хъуамӕ уой арфхъуыдыджын ӕмӕ бӕстон. Йӕ ныхасмӕ гӕсгӕ, республикӕйы Сӕргълӕууӕг ӕмӕ Хицауад ацы фарстыл кусынц. Хӕстӕгдӕр рӕстӕг бӕлвырдгонд ӕрцӕудзысты, къабазы куыстуӕттӕ къуырцдзӕвӕнӕй ракӕнынӕн чи фӕахъаз уыдзӕн, уыцы мадзӕлттӕ.
Фембӕлды архайдтой республикӕйы экономикон рӕзты министр Томайты Хъазыбег ӕмӕ Амалхъомты барты фӕдыл ӕууӕнкджын Медойты Тимур дӕр.
РЦИ-Аланийы Сӕргълӕууӕджы ӕмӕ Хицауады пресс-службӕ
