Цӕгат Ирыстон-Аланийы национ ахастдзинӕдты министр Цуциты Асланы хъӕппӕрисмӕ гӕсгӕ арӕзт ӕрцыд фембӕлд республикӕйы журналисттимӕ. Сӕ ныхасы сӕр уыд «Уӕрӕсейы Федерацийы паддзахадон национ политикӕйы стратеги 2025 азы ӕмгъуыдмӕ» йӕ размӕ цы нысантӕ ӕвӕры ӕмӕ республикӕйы куыд ӕххӕстгонд цӕуынц, уый.
Национ ахастдзинӕдты министр журналисттӕн куыд радзырдта, афтӕмӕй ацы стратеги ист ӕрцыд 2012 азы. 2016 азы та уӕлдӕр хицауады оргӕнтӕ райстой федералон программӕ. Уым нысангонд ӕрцыдысты бӕлвырд мадзӕлттӕ национ политикӕйы ахсджиагдӕр фарстытӕ бӕстондӕр ӕххӕст кӕныны фӕдыл. Уӕрӕсейы Федераци у, дунейы паддзахӕдтӕй фылдӕр адӕмыхӕттытӕ кӕм цӕры, уыдонӕй иу. Цӕры дзы 193 адӕмыхатты. Сӕ фылдӕр ӕнусты дӕргъы цӕрынц ныртӕккӕйы Уӕрӕсейы паддзахады зӕххыл. Стыр ӕвӕрӕн бахастой уӕрӕсейаг паддзахад ӕмӕ культурӕйы рӕзтмӕ.
Федералон программӕмӕ гӕсгӕ Уӕрӕсейы Федерацийы адӕмы бирӕ алыхуызон ӕвзӕгтӕ ӕмӕ сӕ культурӕ хъахъхъӕны паддзахад. Уӕрӕсейы Федерацийы пайда кӕнынц 277 ӕвзаг ӕмӕ диалектӕй, ахуырады паддзахадон системӕйы дзы пайдагонд цӕуы 89 ӕвзагӕй.
Нӕ республикӕ дӕр у, бирӕ адӕмыхӕттытӕ кӕм цӕры, уыдонӕй, цӕры дзы 100 алыхуызон адӕмтӕй фылдӕр. Алыхуызон сты сӕ динтӕ, сӕ традицион ӕгъдӕуттӕ, фӕлӕ цӕрынц кӕрӕдзи ӕмбаргӕйӕ. Уӕрӕсейы Федерацийы федералон программӕмӕ гӕсгӕ, 2019 азы фидаргонд ӕрцыд Цӕгат Ирыстон-Аланийы национ сӕрмагонд программӕ алыхуызон программӕтимӕ. Федералон программӕйӕ уӕлдай ма Цӕгат Ирыстон-Аланийы программӕйы ис, не ‘мзӕххонтӕй Уӕрӕсейы алы рӕтты чи цӕры, суанг фӕсарӕнты дӕр, уыдонӕн ӕххуыс кӕныны программӕ. Нӕ министрад Национ хъуыддӕгты федералон агентадимӕ цы бадзырдтӕ сарӕзта, уыдонмӕ гӕсгӕ ӕххӕст кӕны ӕнӕмӕнг мадзӕлттӕ.
Уыдонмӕ хауынц Конституцийы бон, Уӕрӕсейы бон, Адӕмты иудзинады бон. Уыдонӕй уӕлдай ма аразӕм, нӕхи республикӕйӕн ахсджиаг цы мадзӕлттӕ сты, уыдон. Уыцы мадзӕлтты бирӕ адӕм кӕй фӕархайы, уымӕ гӕсгӕ ацы аз сӕ саразынӕн фадат нӕ уыд. Нысангонд уыд Славянаг фыссынады бон, бирӕ алыхуызон конкурстӕ.
Хӕлардзинады хӕдзар ӕмӕ Дзӕуджыхъӕуы культурӕйы хайады ӕххуысӕй хъуамӕ сарӕзтаиккам бирӕ дзыллон мадзӕлттӕ, фӕлӕ адӕмы ӕнӕниздзинадыл хъуыды кӕнгӕйӕ, ацы фыднизы рӕстӕг бирӕ мадзӕлттӕ конд не ‘рцыдысты.
Республикӕйы азербайджайнаг ӕмӕ сомихаг цӕрджыты ‘хсӕн цӕмӕй быцӕутӕ ма ‘рцӕуа, Нагорный Карабахы быцӕутӕ цӕмӕй республикӕйы цӕрджытӕм ма рахизой, уый тыххӕй мах иу ӕмӕ дыууӕ хатты нӕ фембӕлдыстӕм уыцы адӕмты национ-культурон центрты разамонджытимӕ. Сӕмбӕлдыстӕм барадхъахъхъӕнӕг оргӕнтимӕ дӕр ӕмӕ сын бафӕдзӕхстам, цӕмӕй фылдӕр ӕргом аздахой, уыцы адӕмыхӕттытӕ арӕхдӕр кӕм ӕмбӕлынц, уыцы бынӕттӕм, Центрон базар ӕмӕ таможняйы пункт Уӕллаг Ларсмӕ.
Зӕгъын хъӕуы уый, ӕмӕ дыууӕ адӕмыхӕттыты минӕвӕрттӕ дӕр бамбӕрстой, нӕ сагъӕс цӕуыл у, уый, ӕмӕ сӕ хъуыды ӕргомӕй загътой: Ирыстон уыцы бынат нӕу, Нагорный Карабахы лыггӕнинаг фарст кӕм ӕвзарӕм. Бацӕттӕ кодтам бадзырд ӕмӕ дзы нӕ къухтӕ бафыстам ӕхсӕнадон палатӕ, Стыр Ныхас ӕмӕ дины разамонджытимӕ, цӕмӕй республикӕйы цӕрджытӕ алы ардауӕн архайдӕй сӕхи хъахъхъӕной ӕмӕ мацы змӕсты бахауой, хъахъхъӕной республикӕйы сабыр цард.
Кӕрӕдзи ӕмбаргӕйӕ, сабыр цард кӕнын, терроризм ӕмӕ экстремизмы ныхмӕ тох кӕнын, культурӕ ӕмӕ ӕвзаг бахъахъхъӕнын — уый у федералон программӕйы сӕйрагдӕр нысан ӕмӕ йӕ ӕххӕст кӕндзыстӕм дарддӕр дӕр.
Ахӕм фембӕлдтытӕ журналисттимӕ нысан кӕнӕм ӕрвылкъуыри. Ныхас дзы фӕцӕуы министрады архайдыл, журналисттимӕ фембӕлдтыты мӕнӕй уӕлдай архайдзысты мӕ хӕдивджытӕ, кӕнӕ национ-культурон центрты разамонджытӕ. Рагагъоммӕ журналисттӕ зондзысты, цы фарсты фӕдыл цӕудзӕн ныхас, уый, загъта министр.
Кӕронбӕттӕны бӕлвырд ӕмӕ бӕстон дзуаппытӕ радта журналистты ӕппӕт фарстытӕн дӕр.
Касаты Батрадз
