Нывгæнджыты цæдис рагæй дæр архайы Уæрæсейы регионтимæ сфæлдыстадон ахастдзинæдтæ фидардæр кæныныл. Рязаны облæсты нывгæнджыты куыстыты равдыст байгом уыдзæн Дзæуджыхъæуы. Уый тыххæй нæ уацхæссæгæн радзырдта йæ сæрдар МÆРГЪИТЫ Таймураз. Æрæджы равдыстыты залы байгом Адыгейы Республикæйы зындгонд нывгæнджыты куыстыты экспозици.
Ирыстойнæгты размæ рахастой нывкæнынад, графикæ, скульптурæ æмæ фæлындыны аивады 23 авторы уацмысы. Аивадуарзджытæн ис фадат ХХ æнусы кæрон æмæ XХI æнусы райдианы фыст адыгейаг нывгæнджыты куыстытимæ базонгæ уæвын. Дыууæ республикæйы нывгæнджытæ кæрæдзийы сфæлдыстадимæ хорз зонгæ сты, адæмы размæ сæ хæсгæйæ архайынц дыууæ республикæйы ‘хсæн культурон ахастдзинæдтæ бæрзонд æмвæзадмæ сисыныл. Майкъопы Ныгуылæн музейы сты ирыстойнаг нывгæнджыты куыстытæ, ныр дæр æмæ дзы раздæр дæр цыдысты ирон авторты нывты равдыстытæ. Адыгейы цæрджытæн хæстæг у сæ аивад, уæдæ нæ республикæйы сгуыхт нывгæнæг Сергей Филатовы сфæлдыстадон равдыстытæ Дзæуджыхъæуы æрвылаз дæр фæцæуынц.
Сюжетон-тематикон нывтæ, пейзажтæ, портреттæ æмæ натюрмортты автортæ ирдæй равдыстой се сфæлдыстадон æмæ аивадон фæндты бирæхуызондзинад. Адыгейаг нывкæнынады аивад нысангонд у, куыд ног æнгæсджын фæрæзтæ агурын æмæ нывкæнынады аивады æппæт хуызты хæдбындур скъола къахыл слæууын кæныны разæнгарддзинад. Уæрæсейы адæмон нывгæнæг Кат Теучежы згъæраив триптих «Жизнь» æвæлмæстæй никæй ныууадздзæн. Стыр æхсызгонæй равдыстмæ ‘рбацæуæг базонгæ уыдзæн Адыгейы республикæйы адæмон нывгæнæг Абдулах Берсировы нывтæ «Осетия. Родовая башня», «Алания», «Дом с собакой», «Игривая смуглянка»-имæ.
Цæгат Ирыстон æмæ Адыгейы Республикæйы сгуыхт нывгæнæг Сергей Филатовы нывтæй аивадуарзджытæ ацы хатт фендзысты «Сокровища скифов». Хасан Шеожевы гипсæй конд куыст «Юность»-ы, нывтæ «Мысли» æмæ «Баланс»-ы нывгæнæг равдыста царды арф философон хъуыды. Уæлдай зæрдæмæдзæугæ сты Адыгейы сгуыхт нывгæнæг Абредж Гошефижы нымæт æмæ гобеленæй конд нывæфтыдтæ «Новый замысел» æмæ «История», стæй Адыгейы Нывгæнджыты цæдисы сæрдар Елена Абакумовайы «Праздник адыгской тыквы» æмæ «Легенды Кавказа». Аивадуарзæг стыр цымыдисæй базонгæ уыдзæн Нурбий Дидичев «Праздник» æмæ Иван Извековы «Хребет Каменное море»-йы нывтимæ.
Хъуымац æмæ нывкæнынады хуыз – гильошированийæ куыстытæй Ольга Амалова адæмы размæ ацы равдысты рахаста «Золото скифов». Æрдзы аивдзинад ирд ахорæнтæй равдыста Наталья Стручалина «На реке Белой»-ы.
Равдыст гом кæнынмæ Майкъопæй ссыд сфæлдыстадон кусджыты минæвæртты къорд, разыйæ баззадысты ирыстойнаг аивадуарзджытæй. Уæлдай æхсызгон та сын уыд, нæ республикæйы æрдзы рæсугъддзинад хи цæстæй фенынæн, хæхбæсты, кæмтты сыгъдæг уæлдæфæй риуыдзаг сулæфыны фадæттæ сын кæй сарæзтой, уымæй. Лæварæн уазджытæ ныууагътой хуызджын альбомтæ æмæ Адыгейы Республикæйы Культурæйы министрады Арфæйы ныхас.
ХУЫБИАТЫ Ларисæ
