Республикæ Хуссар Ирыстоны Президенты хæстæ æххæстгæнæг ХЪАМБОЛТЫ Марат фембæлд Уæрæсейы Федерацийы наукæ æмæ уæлдæр ахуырады министр Валерий ФАЛЬКОВИМÆ.
Уæрæсейаг министримæ иумæ Хуссар Ирыстонмæ æрцыд егъау делегаци. Уазджытæ сты уæрæсейаг раззагдæр уæлдæр ахуыргæнæндæттæ æмæ наукон организациты разамонджытæ.
– Наукæ, ахуырад, æнæниздзинад хъахъхъæнынад æмæ хъæууон хæдзарад Хуссар Ирыстоны цæмæй размæ рацæуой, уымæн баххуыс кæнынмæ, стæй алы хъуыддаджы дæр нæ фарсмæ балæууынмæ нæ уæрæсейаг æмкусджытæ сты цæттæ, – бафиппайдта Хъамболты Марат.
Хъамболы-фырт куыд загъта, афтæмæй кусæг фембæлды рæстæг уазджытæ æмæ фысымтæ æрныхас кодтой республикæйæн хъæугæ дæсны кусджытæ цæттæ кæныны, стæй Хуссар Ирыстоны паддзахадон университеты дарддæры рæзты фарстатыл.
– Уæрæсейы уæлдæр ахуыргæнæндæтты æххуысæй архайдзыстæм инженертæ æмæ техникон æгъдауæй дæсны специалисттæ цæттæ кæнынмæ, – загъта Хъамболты Марат æмæ фембæлды кæронбæттæны йе ‘ргом аздæхта Хуссар Ирыстоны райрæзты ахсджиагдæр фарстатæм.
Йæ хъуыдымæ гæсгæ, ахуырадон, наукон æмæ æрдзæй лæвæрд хъомыс Хуссар Ирыстонæн у бирæ. «Нæ хæс у афоныл æй бафиппайын æмæ йын йæ ных экономикæйы рæзтмæ æмæ адæмы царды уавæртæ хуыздæр кæныны ‘рдæм саразынмæ», – зæгъы Хъамболты Марат.
Фембæлды архайджытæ бафыстой Уæрæсейы Федерацийы Наукæ æмæ уæлдæр ахуырады министрад æмæ Республикæ Хуссар Ирыстоны ‘хсæн æмгуыстады бадзырд. Документ нысан кæны дыууæ паддзахады уæлдæр ахуыргæнæндæттæ æмæ наукон организациты ‘хсæн æмгуыстад, цы фæлтæрддзинад сæм ис, уыимæ кæрæдзи зонгæ кæнын, стажировкæтæм æмæ дæсныдзинад бæрзонддæр кæныны тыххæй студентты, ахуыргæнджытæ æмæ ахуыргæндты æрвитын æмæ æндæртæ. Уымæй уæлдай, араздзысты иумæйаг иртасæн куыстытæ, архайдзысты нымæцон ахуырадон технологитæ парахат кæныныл, араздзысты наукон конференцитæ, форумтæ æмæ олимпиадæтæ.
Иннæ ахсджиаг хъуыддаг – Цæгат Ирыстоны фæзындзысты уæрæсейаг уæлдæр ахуыргæнæндæтты филиалтæ, рæздзæн ахуырадон æмæ иртасæнтæ кæныны инфраструктурæ, фæсивæдон хъæппæристæн уыдзæн æххуыс.
Хуссарирыстойнаг студенттæн, ахуыргæнджытæ æмæ æрыгон ахуыргæндтæн уыдзæн ахуыры, размæ цæуын æмæ уæрæсейаг раззагдæр ахуырадон æмæ наукон центрты иумæйаг проектты архайыны ног гæнæнтæ.
Нæ уацхæссæг
