Цæгат Ирыстоны байгом æфсæддон-техникон форум, йæ фæлгæты арæзт æрцыдысты æфсæддон æмæ культурон мадзæлттæ.
58-æм æфсады командæгæнæджы хæстæ рæстæгмæ æххæстгæнæг Игорь Гвозденко арфæйы ныхæсты фæстæ радзырдта уазджытæн, равдысты цавæр хæстон техникæ ис, уый тыххæй.
— Мах ацы æфсæддон-техникон форум гом кæнæм цыппæрæм хатт. Фæстаг рæстæджы мадзал равдыста йæ ахадындзинад нæ бæстæ бахъахъхъæныны куысты. Мах сæрбæрзонд стæм нæ флот, не ‘фсад æмæ нæ бæстæ хъахъхъæнджытæй. Уыдон кæддæриддæр хастой сабырдзинад æндæр бæстæты адæмтæн дæр. Абон, Сæрмагонд операцийы фæлгæты, не ‘фсæддонтæ донбассæгтимæ кадджынæй хъахъхъæнынц сæ Фыдыбæстæ, уыимæ, Донецкы æмæ Луганскы æназым адæмы дæр. Равдысты базонгæ уыдзыстут æфсæддон техникæйы ногдæр хуызæгтимæ, Фыдыбæстæйы Стыр хæсты азты хæцæнгæрзтæ, нырыккон æхсæнгæрзтæ æмæ æфсæддон дзаумæттимæ, æндæр бæстæты националистты къордты æмæ Украинæйы æфсæддон тыхтимæ дæр, — загъта Игорь Гвозденко.
Форумы сæйрагдæр хай Мæскуыйы фæз «Патриот»-ы байгом кодта нæ бæстæйы Президент Владимир Путин. Уый йæ ныхасы фæнысан кодта, Уæрæсейы æфсад кæдфæнды дæр кæй æрлæууы тохы быдыры йæ бæстæйы сæраппонд, уыимæ, сæрибардзинад фæхæссы иннæ адæмтæн дæр.
— Абон, Сæрмагонд операцийы фæлгæты, не ‘фсæддонтæ æххæст кæнынц сæ хæстон хæс. Тох кæнынц фашизм æмæ национализмимæ, сæ рæстæджы нæ хистæртæ цы нæ сарæзтой кæронмæ, ууыл архайынц. Хæст у æвирхъау хабар, фæлæ æз зонын, Ирыстон æмæ Уæрæсейы фылдæр адæм разы кæй сты нæ Президенты уынаффæимæ æмæ кæй балæууыдысты йæ фарсмæ. Алцы æнцон нæу, хæсты та уымæй уæлдай. Фæнды мæ, цæмæй сымах фенат, не ‘фсад цавæр техникон æмвæзадмæ схызт, уый. Чидæриддæр нæ лæппуты фарсмæ зæрдæйæ лæууы, уыдонæн зæгъын бузныг, — загъта Цæгат Ирыстоны Сæргълæууæг Сергей Меняйло.
Сергей Меняйло Игорь Гвозденкоимæ æркастысты æфсæддон-техникон равдыстмæ. Мобилон музейы базонгæ сты Фыдыбæстæйы Стыр хæсты азты хæцæнгæрзтимæ, уыимæ, музейы равдыстой, Сæрмагонд операцийы рæстæг цы æхсæнгæрзтæ дæрæнгонд æрцыдысты, уыдон дæр. Уымæй уæлдай, армукъайы федтой Цæгат Ирыстоны куыстуæтты продукци.
Мадзалы уазджыты æхсæн уыдысты Донбассæй æрбалидзджытæ — Еленæ Самойленко æмæ Наталья Жовба. Уыдон загътой бузныджы ныхæстæ.
Культурон программæ хъæздыг уыд кæфтытæ, зарджытæ æмæ æндæр аивадон мадзæлттæй. Байгом дзы кодтой 58-æм æфсады спортивон комитеты фæз.
Гобозты Агуындæ
Къамтæ систа Хъайырты Дианæ
