Ацы бонты горæт Мæскуыйы йæ куыст кодта навигацион технологиты дунеон форум «Сфера». Уыцы стыр æмбырды фæлгæты РЦИ-Аланийы Сæргълæууæг Сергей Меняйлойæн фембæлд уыд паддзахадон корпораци «Роскосмос»-ы генералон директор Юрий Борисовимæ.
Сергей Меняйло æмæ Юрий Борисов куыд фæбæрæг кодтой, афтæмæй республикæ æмæ корпораци ныридæгæн æнгом æмгуыстад кæнынц ахуырадон æмæ рухстауæн программæты къабазы. Уыимæ, фембæлды архайджыты хъуыдымæ гæсгæ, рæстæг домы, цæмæй уыцы æмархайд ноджы фенгомдæр æмæ фæуæрæхдæр уа. Уымæн фæахъаз уыдзæн æмгуыстады сæрмагонд бадзырд. Ныридæгæн республикæ æмæ корпорацийы минæвæрттæ уыцы бадзырды уагæвæрдтæ бабæстон кодтой, æмæ йæ ныр Сергей Меняйло æмæ Юрий Борисов бафыстой. Уый фæрцы ныр куыст цæудзæн фылдæр иумæйаг проекттыл, регионы дарддæры социалон-экономикон æмæ инновацион рæзтæн ахъазгæнæг программæтыл.
— Ныртæккæ нæ сæйрагдæр нысантæй иу хъуамæ суа регионы наукон, техникон, инновацион райрæзт. Зæгъæм, ныртæккæ Дзæуджыхъæуы йæ куыст æнтыстджынæй кæны космосон аппаратты конструктор, ССР Цæдисы Паддзахадон премийы лауреат Къомайты Русланы номыл Космонавтикæйы скъола. Уым рæзгæ фæлтæры æмхиц кæнынц космосон технологитæм, дæттынц сын райдайæн зонындзинæдтæ нырыккондæр техникон фæрæзты тыххæй. Ахуырадон æмæ рухстауæн фæстиуæгæй уæлдай уыцы æууæл ахъаз уыдзæн, цæмæй рæзгæ фæлтæры минæвæрттæ фидæны сæ цард снывонд кæной космонавтикæйæн. Корпораци æмæ республикæйы æмгуыстад райрæзын кæнынæн хорз фадæттæ ис. Æмæ уыдон Ирыстоны ахуырад æмæ наукæйы, стæй промышленносты къабазы дарддæры рæзтыл кæй сахаддзысты, ууыл мæ зæрдæ дарын, — загъта Сергей Меняйло.
РЦИ-Аланийы
Сæргълæууæджы æмæ Хицауады
пресс-службæ
