Пятигорскы зонындзинæдты центр «Машук»-ы фæзуаты Уæрæсейы æхсæнад «Зонынад»-ы æххуысæй ацыд ахуырадон семинар «Коммуникативон фæтæгад. РЦИ-Аланийы командæ». Архайдтой дзы бюджетон æмæ æхсæнадон организациты кусджытæ, журналисттæ, республикæйы службæгæнджытæ. Центр «Машук»-ы разамынд Цæгат Ирыстоны командæйы æрбахуыдта, цæмæй йын йæ бындурыл сараза ахуырадон интенсив.
Семинары сæйраг мадзал уыдис, РЦИ-Аланийы Сæргълæууæг Сергей Меняйло, Цæгат-Кавказы федералон зылды УФ-йы Президенты Æххæстбарджын минæвары æххуысгæнæг Евгений Ткачев, зындгонд уæрæсейаг журналист, Паддзахадон Думæйы депутат Евгений Попов кæм архайдтой, уыцы пленарон дискусси. Фембæлды модератор уыдис зонындзинæдты центр «Машук»-ы директор, Уæрæсейы æхсæнад «Зонынад»-ы генералон директоры хæдивæг Антон Сериков.
Йæ раныхасы Сергей Меняйло куыд фæбæрæг кодта, афтæмæй, бынæтты нырыккон уавæрты æвæрццæг фæстиуджытимæ ахадгæ куыст рацаразын æнæ иудадзыг æргом ныхас информацион «быдыры» æппæт архайджытимæ — дзыллон хабархæссæг фæрæзтимæ, блогертимæ, хицауады минæвæрттимæ, республикæйы цæрджытимæ — нæ бантысдзæн.
— Нæ бæстæ абон зындзинæдтæ æвзары, æмæ не ‘ппæт дæр хорз æмбарæм, афойнадыл раст информаци райсыны ахадындзинад. Уымæ гæсгæ, мах адæмимæ ныхас кæнæм æрмæст газеты фæрстæй æмæ телеэфирæй нæ, фæлæ ма уæрæхдæр — социалон хызы руаджы. Уый у оперативон æмæ æнцонвадат коммуникативон хотых. Нæ хæс у адæммæ рæстдзинад фæхæццæ кæнын, сайæн ныхæстæн хъуамæ ныхкъуырд лæвæрд цæуа. Уæрæсейы знæгтæ архайынц уавæрæй спайда кæныныл, æхсæнад ныддихтæ кæныныл. Уымæ гæсгæ, сæйрагдæр у нæ иудзинад информацион куысты, рухстауæн архайды, субъекты размæ цы сæйрагдæр нысантæ æвæрд цæуы, уыдоны æмбарынады абоны ивддзинæдты дуджы, — загъта Цæгат Ирыстоны Сæргълæууæг.
Антон Сериковы ныхæстæм гæсгæ, Цæгат Кавказы разамонæг кадрты райрæзт у центр «Машук»-ы вазыгджын нысан.
— Традицион æгъдауæй мах бынæттон регионты паддзахадон æмæ муниципалон службæгæнджытæн саразæм программæ. Ныр сыл бафтыд Цæгат Ирыстоны командæ дæр: ахуырты архайынц 150 фæткдæттæджы фæсивæдон æмæ информацион политикæйы. Ныфс нæ ис фидæны нæ æмгуыстад фæуæрæхдæр кæнынæй, — загъта зонындзинæдты центр «Машук»-ы директор, Уæрæсейы æхсæнад «Зонынад»-ы генералон директоры хæдивæг.
Евгений Попов фæбæрæг кодта, ахæм ахуырадон мадзæлттæ стыр пайда кæй сты, профессионалтæн фадат кæй дæттынц сæ фæлтæрддзинадæй кæрæдзийæн фæхай кæнынæн æмæ ног зонындзинæдтæ райсынæн.
Журналист ма, абон дунейы цы политикон цаутæ цæуы, уыдоны тыххæй йæ цæстæнгас загъта:
— Мах цæрæм ивддзинæдты дуджы. Уæрæсейы знæгтæ архайынц нæ адæмы царды уавæртæ фæныллæгдæр кæныныл, сæ нысан у нæ бæстæ бабын кæнын, фесафын. Æддагон тыхтæ, сæхиуыл нæ ауæрдгæйæ, архайынц æхсæнадон уавæр фехалыныл. Уымæ гæсгæ, сæйрагдæр у, цæмæй нæм æппæт фарстатæн дæр дзуаппытæ уа.
Семинары программæйы уыдис паддзахадон оргæнтæ, дзыллон хабархæссæг фæрæзтæ æмæ, æхсæнады ‘хсæн социалон ахадындзинад кæмæн ис, уыцы фарстатæ лыг кæныны тыххæй диалог рацаразынæн ахъаз чи фæуыдзæн, ахæм лекцитæ, мастер-класстæ. Уый тыххæй æрбахуыдтой уæрæсейаг политологты, æхсæнадимæ бастдзинады къабазы экспертты.
Радиостанцæ «Дзуры Мæскуы»-йы политикон фæлгæсæг, æхсæнад «Зонынад»-ы лектор Александр Асафов семинары архайджытæн бамбарын кодта, абоны уавæрты кусæг командæты мидæг æмæ сæ аудиторитимæ куыд архайын хъæуы, уый. Журналист Евгений Попов та радзырдта, информацион «лæсæнтæй» конструктивон ног хабæрттæ куыд аразын хъæуы, уый тыххæй.
Зонындзинæдты центр «Машук» у Уæрæсейы æхсæнад «Зонынад» æмæ Уæрæсейы фæсивæды иумæйаг проект.
Гапбаты Алетæ
