Зындгонд нывгæнæг æмæ педагог, Уæрæсейы Нывгæнджыты цæдисы стипендиат Анастасия Евграфова фарон бындур кæмæн сæвæрдта, уыцы аивадон студи «Матисс» йæ фыццаг дзуапдæттæн равдыст «Матисс»-ы фыццаг аз» сарæзта Дзæуджыхъæуы Историйы музейы.
Æхсæрдæс æвзонг авторы кæй скодтой, экспозицийы фенæн ис ссæдзæй фылдæр ахæм куысты. Амынд студийæн кæй ном радтой, уыцы æрмдæсны Анри Матисс (1869-1954 азтæ) уыд модернизмы дуджы раззагдæр нывгæнджытæй иу. Царды стыр цæлхдуртæ аиуварсгæнæг Матисс фæстагмæ сфæлдыстадон дæсныйад равзæрста. Вазыгджын операцийæн бафæразыны фæстæ 1889 аз Анри нывтæ кæнын райдыдта. Матиссæн аивæдты скъоламæ ахуыр кæнынмæ бацæуын бантыст æрмæст фæндзæм фæлварæны фæстæ. Фæстæдæр æрмдæсныйæн нывкæнынады къабазы фæзынд хи аивадон миниуæг.
Алы адæймагæн дæр аивады къабазы архайыны фадат кæй ис, Анрийы хъысмæт ууыл дзурæг у. Матисс куыд кодта, афтæ студийы æвзонг нывгæнджытæ дæр, аивады къабазы фыццаг къахдзæфтæ кæнгæйæ, хуыз æмæ æддаг уынды фæрцы алфамблай цард æвдисынц. Курдиат æрмæст иудадзыгон фæллойы фæрцы кæй раргом вæййы, студийы ном нын уый æмбарын кæны.
Афæдзмæ студийы æвзонг уæнгтæ равдысты сæвæрынæн аккаг куыстытæ цæмæй бацæттæ кæной, Уæрæсейы Нывгæнджыты цæдисы уæнг, 15 азæй фылдæры дæргъы педагогæй кусæг Анастасия Евграфова ууыл бацархайдта.
Æрыгон нывгæнджытæ алфамблай царды аивдзинад сфæлдыстадон фæрæзты фæрцы кæй æвдисынц, экспозици «Матисс»-ы фыццаг аз» ууыл дзурæг у. Равдысты æвæрд алы куыст дæр, æргом кæны æвзонг нывгæнæджы зондахаст æмæ йе ’нкъарæнтæ.
«Матисс» сфæлдыстадон æнтыстдзинæдтæй хайджын уæд!
Татьяна Шеходанова,
авторы ист къамтæ
