Дзæуджыхъæуы знон кадджын уавæры байгом Бинонты бирæфадатджын центр (Семейный МФЦ). Уыимæ, æнæхъæн Цæгат Кавказы ацы центр у иунæг. Арæзт æрцыд РЦИ-Аланийы Фæллой æмæ социалон рæзты министрады хъæппæрисæй, нæ республикæйы Сæргълæууæджы æххуысæй.
Бинонты бирæфадатджын центр у, уæззау уавæрты чи цæры, бирæ æмæ рынчын сывæллæттæ кæмæн ис, уыцы бинонтæ æмæ, сæрмагонд æфсæддон операцийы архайджытæй паддзахады æххуысхъуаг чи у, уыдоны социалон лæггæдтæн.
Амынд адæмы нæ хъæудзæн уæлæмхасæн гæххæттытыл зилын, æвæрæз æви æнæххæст бинонтæй сты, уый тыххæй æвдисæндартæ агурын. Сæйрагдæр уыдзæн, цы социалон куырдиатимæ æрбацæуой бинонтæ, уыцы ахсджиаг фарста алыг кæнын.
Бинонты бирæфадатджын центр байгом кæнынмæ æрбацыдысты РЦИ-Аланийы Сæргълæууæг Сергей Меняйло, РЦИ-Аланийы Хицауады Сæрдары хæдивæг Платы Альбинæ æмæ РЦИ-Аланийы фæллой æмæ социалон рæзты министр Айдарты Алинæ.
Нæ республикæйы Сæргълæууæг æрзылд центры æппæт агъуыстытыл дæр æмæ федта, цы фадæттæ дзы ис, уый.
— Æвæрæз æмæ царды уæззау уавæрты бахауæг бинонтыл сагъæс кæнын æмæ сын баххуыс кæнын, у паддзахады хæс. Нæ бæстæйы Президент хицауиуæггæнæг оргæнтæн бафæдзæхста ацы фарстамæ фылдæр æргом здахын æмæ архайын, зын уавæрты цы æрыгон бинонтæ бахаудысты, уыдонæн æххуыс кæнын. Абон центр системон куысты бындур у, ис ын бастдзинад æппæт ведомствæтимæ дæр. Ацы бæстыхайы цалдæр азы размæ байгом кодтам уæлдæр амынд адæмы къордæн лæвар юридикон æххуысы бюро дæр, æрæджы та ма сарæзтам «Фыдыбæстæ хъахъхъæнæджы» Фонд дæр. Уыцы Фонды хæстæ та сты сæрмагонд æфсæддон операцийы архайджытæ æмæ сæ бинонтæн æххуыс кæнын, сæ социалон фарстатæ сын æххæст кæнын. Центры æмæ Фонды дæр дæсны специалисттæ архайдзысты материалонæй суанг психологон æххуысы онг фарстатыл. Центр æмæ Фондимæ кусдзæн нæ республикæйы Фæллой æмæ социалон рæзты министрад. Йæ цæст дардзæн æппæт социалон фарстатæм дæр, — загъта Сергей Меняйло.
Бинонты бирæфадатджын центры куыст цæудзæн онлайн-режимы, ис дзы 3 азы онг сывæллæттæн хиирхæфсæн æппæт мадзæлттæ, сылгоймæгты клуб æмæ бахъуаджы сахат психологтæ, ахуыргæнджытæ æмæ юристты къорд. Бинонты бирæфадатджын центры бындурыл алы аз дæр социалон æххуыс исдзысты 500 бинонтæ. Нæ республикæйы ацы къорды адæмæн иннæ районты дæр арæзт æрцæудзæн сæрмагонд сайт. Уым сын фадат уыдзæн сæ ахсджиаг фарстаты фæдыл куырдиæттæ бадæттынæн.
Саутæты Тамилæ,
къамтæ систа Хъайырты Дианæ
