Мæскуыйы Евгений Вахтанговы номыл театры директор Кирилл Крокы ныхасмæ гæсгæ, фарон Вахтанговы хæдзары равдыстæуыд 235 спектаклы, ома, æндæразимæ абаргæйæ, 67 проценты фылдæр.
Афæдзмæ Вахтанговы хæдзары æвдыст спектакльтæ фенынмæ æрацыд 12 мин адæймаджы, ома, æндæразимæ абаргæйæ, 58 проценты фылдæр.
Вахтанговы номыл театры артисттæ Мæскуы æмæ Дзæуджыхъæуы равдыстой 1522 спектаклы (уый у рекордон нымæц).
Фарон театры æнæбюджетон æфтиæгты бæрц рауад 1,476 миллиард сомы, ома, æндæразимæ абаргæйæ, 35,5 проценты фылдæр. Æфтиæгты фылдæр хай – 1,1 миллиард сомы – райстой спектакльтæ, сфæлдыстадон изæртæ æмæ концерттæм билеттæ уæй кæныны хъуыддагæй.
Кирилл Крокы ныхасмæ гæсгæ, театр пайда кæнын райдыдта иу театрдзауыл бюджетон хæрдзты бæрæггæнæнæй. Фарон ацы бæрæггæнæн рауад 1786 сомы, ома, æндæразæй 13 проценты къаддæр.
– Фынддæс-ссæдз мин сомы аргъ билеттæ кæм нæ уæй кæнынц, мæнмæ гæсгæ, Вахтанговы номыл театр у иунæг ахæм мæскуыйаг театр. Нæ
театры æвдыст спектакльтæм билеты рæстæмбис аргъ у 2749 сомы. Кæй зæгъын æй хъæуы, ацы аргъ дæр аслам нæу, фæлæ ныртæккæ не ’вдыст спектакльтæм æппæтæй зынаргъдæр билеты аргъ у дыууадæс мин сомы, æппæтæй асламдæр та – дыууæсæдæ сомы. Алы адæймагæн дæр ис билет балхæныны фадат, – загъта театры директор.
Уæ зæрдыл уын лæууын кæнæм: ацы аз Вахтанговы номыл театр Дзæуджыхъæуы сараздзæн дыккаг театралон фестиваль «Вахтангов. Фæндаг фыдыуæзæгмæ».
(«ОсНова.News»)
