Уæрæсейы Федерацийы Мидхъуыддæгты министрады паддзахадон автоинспекци, фистæгæй цæуæг адæмы æдасдзинад фæфылдæр кæныны тыххæй, РЦИ-Аланийы сарæзта æппæтуæрæсеон социалон кампани «Продвижение безопасности».
Уый фæдыл Дзæуджыхъæуы цы пресс-конференци уыд, уым дзыллон хабархæссæг фæрæзты минæвæрттимæ фембæлдысты республикæйы паддзахадон автоинспекцийы хицауы хæдивæг Бурдзиуты Алыбег, РЦИ-Аланийы ахуырад æмæ наукæйы министры хæдивæг Дзанайты Марк, Цæгат Ирыстоны æнæниздзинад хъахъхъæнынады министры хæдивæг Хетæгты Фатимæ, Æвирхъау бæллæхты медицинæйы центры директоры хæстæ рæстæгмæ æххæстгæнæг Бутаты Артур æмæ иннæтæ.
Æппæтуæрæсеон социалон кампани «Æдасдзинады размæцыд» арæзт цæуы федералон проекттæ «Фæндаггон цыды æдас-
дзинад» æмæ «Царды инфраструктурæ»-йы фæлгæты. Программæты нысан у, фæндæгтыл цы æвирхъау бæллæхтæ æрцæуы, уыдоны нымæц фæкъаддæр кæнын.
Республикæйы паддзахадон автоинспекцийы статистикон бæрæггæнæнтæм гæсгæ, ивгъуыд азы дæргъы Цæгат Ирыстоны æрцыд 919 фæндаггон бæллæхы. Фæмард дзы 84 адæймаджы, 1327 адæймаджы та дзы хъыгдард баййæфтой. Уыдонæй,
фистæгæй цæугæйæ, бæллæхы чи бахауд, уыдон сты алы кары 225 адæймаджы, фæмард дзы – 26, цæфтæ та фесты – 210.
Хъыгагæн, фæндаггон бæллæхты 96,4 проценты æрцыдысты, фæндæгты сæрты фистæгæй цæуæг адæмæн цы сæрмагонд бынæттæ арæзт цæуы, уым. Уæлдайдæр та –
изæрыгон æмæ æхсæвы. Уый фæдыл паддзахадон автоинспекцийы кусджытæ адæммæ сидынц, цæмæй изæрыгон рухсздахæг дзаумæттæ кæнæ æндæр æрмæджытæй пайда кæной. Уымæй сæхи фыдбылызæй бахъахъхъæн-
дзысты.
Æмбырды архайджытæ бæстон дзуаппытæ раттой журналистты фарстытæн. Алы архайæгæн дæр балæвар кодтой рухсздахæг дзабыры бæттæнтæ æмæ дæгъæлтыл кæнгæ брелоктæ, цæмæй, æхсæвыгон цæугæйæ, æдасдæр уой.
ХЪОЙБАЙТЫ Галинæ,
къам систа
Татьянæ ШЕХОДАНОВА
