РЦИ-Аланийы Сæргълæууæг Сергей Меняйло æмæ Уæрæсейы Федералон Æмбырды Федерацийы Советы Сæрдары хæдивæг, Федерацийы Советы Креативон (сфæлдыстадон) Уæрæсейы Федерацийы индустритæ æмæ адæмон аивадон амалиуæгады рæзты къамисы сæрдар Инна Святенко куысты фæдыл фембæлдысты. Æрныхас кодтой Цæгат Ирыстоны социалон-экономикон къабаз æмæ инвестицион политикæйыл, сæрмагонд æфсæддон операцийы архайджытæ æмæ сæ бинонтæн æххуысы фарстатыл, ахуырад, æнæниздзинад хъахъхъæнынад, культурæ æмæ туристон къабазы рæзтыл, стæй, 2024 азы Субъекты боны Федерацийы Советы уынаффæ куыд æххæстгонд цæуы, ууыл.
Фембæлды архайдта Цæгат Ирыстонæй Уæрæсейы Федерацийы сенатор Виталий Назаренко.
– Социалон-экономикон рæзты стратегион нысантæ сæххæст кæнын йæ бон у æнæфæтасгæ, æнæниз æмæ эффективон экономикæйæн. Уæрæсейы Президент æмæ федералон æххуысы руаджы абон республикæ хъазуатонæй аразы ног скъолатæ, рæвдауæндæттæ, фæндæгтæ, медицинæйы уавæртæ хуыздæр кæны, культурон æгъдауæй фæлладуадзæн ног бынæттæ аразы. Регионы экономикæйы реалон сектор æмæ социалон къабазы инвестицитæ фылдæр кæнынц паддзахадон программæтæ æмæ национ проекттæ æххæст кæныны руаджы, – фæбæрæг кодта Сергей Меняйло.
Хицæнæй ныхас цыди сæрмагонд æфсæддон операцийы архайджытæ æмæ сæ бинонтæн æххуысы фарстатыл. Инна Святенко тынг ахсджиаг хъуыддагыл нымайы хæстонты сабыр цардмæ раздахыны хъуыддаг æмæ загъта, Цæгат Ирыстоны фæлтæрддзинад хæстон быцæуты ветерантæ скъолаты директорты уынаффæгæнджытæй нысангонд кæй æрцыдысты æмæ рæзгæ фæлтæры хъомылад æмæ æхсæнадон царды кæй архайынц, уый хорз дæнцæг кæй у.
Уымæй уæлдай ма, вице-спикер хорзыл банымадта регионы бавæрæн адæмон аивадон амалиуæгад бахъахъхъæнынмæ.
– Тынг ахсджиаг хъуыддаг у, регионы стыр куыст кæй бакодтат адæмон аивадон амалиуæгады (промыслы) рæзт æмæ парахат кæныныл, адæмон дæсныты баиу кæныныл – арæзт æрцыд Ассоциаци «РЦИ-Аланийы адæмон аивадон амалиуæгады центр». Мах уыдыстæм Центры, зонын, туристон маршруттæм хаст кæй у, уый, æмæ объектмæ чи ‘рбацæуы, уыцы туристты нымæц иудадзыг рæзы. Æнæмæнг хъæуы маршрутыл бафтауын æрмдæсныты æрмадзтæ, – загъта Инна Святенко.
– Уый нæ истори, культурæ, хæдхуыздзинады хай у. Не ‘рмдæсныты
куыстмæ цымыдисдзинад рæзы. Дарддæр дæр ацы къабазæн æххуыс кæндзыстæм, араздзыстæм сын уæлæмхасæн гæнæнтæ сæ куыстæн, – загъта Цæгат Ирыстоны Сæргълæууæг.
Креативон индустриты рæзты фарстайыл æрлæугæйæ, Сергей Меняйло фæбæрæг кодта, республикæйы арæзт кæй цæуынц тематикон форумтæ, Республикон аивæдты лицейы бындурыл байгом фыццаг Креативон индустриты скъола. Уым республикæйы алы рæттæй сабитæ ахуыр кæнынц дизайн, звукорежиссурæ, музыкæ, фото– æмæ видеокондад.
Федерацийы Советы делегаци Цæгат Ирыстоны ис кусæг балцы Федерацийы Советы Креативон (сфæлдыстадон) индустритæ æмæ адæмон аивадон амалиуæгады рæзты къамисы æмбырды фæлгæты.
Делегацийы уæнгтæ – Федерацийы Советы социалон политикæйы комитеты уæнгтæ Сергей Горняков, Анастасия Жукова, Наталья Косихина, Федерацийы Советы федеративон арæзтад, регионалон политикæ, бынæттон хиуынаффæйад æмæ Цæгаты хъуыддæгты комитеты уæнгтæ Денис Гусев æмæ Надежда Ильина, Федерацийы Советы бюджет æмæ финансон базарады комитеты уæнг Елена Дягилева, Федерацийы Советы наукæ, ахуырад æмæ культурæйы комитеты сæрдары хæдивæг Людмила Скаковская, Федерацийы Советы наукæ, ахуырад æмæ культурæйы комитеты уæнг Ольга Щетинина.
Ацы бонты делегацийы уæнгтæ зонгæ кæнынц РЦИ-Аланийы Адæмон аивадон амалиуæгады рæзты центры архайдимæ, национ брендты галерей «Акцент» æмæ хæцæнгæрзты æрмадз «Арион»-имæ. Уазджытæ ма бабæрæг кæндзысты Æхсæнадæмон терроризмы ныхмæ профилактикон культурон-патриотон центр «Беслан. Школа №1» æмæ Креативон индустриты скъола, стæй сараздзысты цæлхæмбырд ахæм темæйыл: «Креативон индустриты рæзт: регионалон практикæтæ, рæзты тæлмытæ æмæ паддзахадон æххуысы мадзæлттæ».
РЦИ-Аланийы Сæргълæууæг æмæ Хицауады пресс-службæ
