РЦИ-Аланийы Хицауады Сæрдар ДЗАНАЙТЫ Барисы разамындæй уыд Промышленнон продукцийы æнæзакъон зилдухы ныхмæ республикон къамисы радон æмбырд. Къамисы уæнгтæ се ’ргом аздæхтой, хойраджы продукттæ æмæ хосты хæрзхъæддзинадмæ цæстдарды мадзæлттæм, цауд продукцийæн базарадмæ фæндаг æрæхгæныны фарстатæм.
Хойраджы продуктты хæрзхъæддзинад куыд бæрæггонд цæуы, республикæмæ иннæ регионтæй цы продукци ласынц, уый санитарон сыгъдæгдзинад æмæ адæймаджы æнæниздзинадæн æдасдзинады домæнтæн дзуапп цас дæтты, æппæт уыдæтты тыххæй уыд йæ доклад Ветеринарон æмæ фитосанитарон цæстдарды федералон службæйы цæгаткавказаг управленийы хицауы хæдивæджы хæстæ æххæстгæнæг Виктор Воронковæн.
Боны фæткы фарстатыл раныхас кодтой Æнæниздзинад хъахъхъæнынады къабазы уавæрмæ цæстдарды федералон службæйы цæгатирыстойнаг управленийы разамонæг Ольгæ Давыдова, республикæйы æнæниздзинад хъахъхъæнынады министр Тебиаты Сослан, Цæгат Ирыстоны таможняйы хицау Цегойты Георги, «Роспотребнадзор»-ы регионалон управленийы сæргълæууæг Тыбылты Алан æмæ иннæтæ.
Докладгæнджыты хъусынгæнинæгтæн хатдзæгтæ кæнгæйæ, Дзанайты Барис куыд бафиппайдта, афтæмæй фарстамæ бардарæг æппæт ведомствæты сæйрагдæр хæс у Цæгат Ирыстоны базарадон хызæг æфсадын, æппæт нормативон домæнты аккаг чи у, хойраджы ахæм продукцийæ. Йæ ныхасмæ гæсгæ, цауд продукцийæн нæ базарты бынат хъуамæ ма уа.
– Абон паддзахад æппæтвæрсыг æххуыс кæны хъæууонхæдзарадон æмæ хойраджы продукци уадзæг куыстуæттæн. Уыдон дæр уæлдай къæрцхъус хъуамæ уой, продукцийы хæрзхъæдзинадмæ комкоммæ бар чи дары, уыцы фарстатæм. Иннæмæй та, цæстдарæг ведомствæтæ алкæддæр хъуамæ цæттæ уой уыдонæй дзуапп æрдомынмæ, цæмæй фæлхасгæнæгмæ фиппаинæгтæ ма уа хойраджы продукцийы хæрзхъæддзинадмæ, – бафиппайдта Хицауады Сæрдар.
Боны фæткы фарстаты фæдыл къамисы уæнгтæ бæлвырд амынддзинæдтæ раттой «Россельхознадзор» æмæ иннæ цæстдарæг службæты минæвæрттæн. Уыимæ, уæлдай æргом хъуамæ здæхт æрцæуа, саниарон цæстдарды службæтæн паддзахадон арæныл цы посттæ ис, уыдоны æнаипп куыстмæ.
КАЛМАНТЫ Аслан
