Цæгат Ирыстоны Сæргълæууæг Сергей МЕНЯЙЛОЙЫ разамындæй уыд Инвестицион архайды фæдыл республикон советы радон æмбырд. Советы уæнгтæй уæлдай, фембæлды архайæг уыдысты инвестицион æмæ арæзтадон компанитæ, стæй прокуратурæйы минæвæрттæ.
Æмбырды архайджытæ æркастысты, инвестортæ цы проекттыл бакусынвæнд кæнынц, уыдонæй цалдæрмæ. Профилон республикон ведомствæты минæвæрттæ алкæцы проекты фæдыл дæр рагагъоммæ сæ хатдзæгтæ скодтой æмæ сæ ныр рахастой советы уæнгты тæрхонмæ.
Ныхас цы хъуыддæгтыл рауад, уыдонæй иу уыд, Дзæуджыхъæуы цæгат-
ныгуылæйнаг хаймæ ’ввахс цы зæххытæ (участочы фæзуат у 112 гектары) ис, уыдоны дарддæры комплексон райрæзты проект. Разамонæг компани «Долина Симд»-ы генералон директор Хъыбызты Тамерлан бæстон радзырдта, фидæны микрорайоны арæзтад æмæ фæлгонцадыл куыд кусынвæнд кæнынц, уый тыххæй.
Компанийы минæвары раныхасæн хатдзæгтæ кæнгæйæ, Сергей Меняйло куыд бафиппайдта, афтæмæй амынд фæзуаты дарддæры райрæзты проекты, фыццаджы-фыццагдæр, хъуамæ нысангонд æрцæуой инженерон коммуникацитæ æмæ фæндаггон инфраструктурæйы объекттæ, парктæ, къахвæндæгтæ, æндæр æхсæнадон бынæттæ æмæ социалон кусæндæттæ. Стæй – уыцы объекттæм «бабæттын» зæххы хайæ пайда кæныны пълантæ æмæ, йыл цы цæрæн хæдзæрттæ æмæ æндæр бæстыхæйттæ æрбынæттон уыдзæн, уыдон.
– Афон æрцыд, цæмæй бæрæггонд æрцæуа, æппæт нормативон домæнтæ сыгъдæгзæрдæ æмæ бæрнонæй чи ’ххæст кæны, йæ куыстмæ фаутæ æрхæссæн кæмæн нæй, ахæм арæзтадон компаниты номхыгъд. Уыдоны бæрны фидæны бакæнæн уыдзæн уæлдай вазыгджындæр проекттыл куыст, – загъта Цæгат
Ирыстоны Сæргълæууæг. – Цавæрфæнды проекты кой куы кæнæм – «Долина Симд» уа, кæнæ æндæр – хъуамæ дзы хыгъд цæуой, регионы цы социалон программæтæ ис, уыдон. Зæгъæм, сæ иу – адæмы кæлæддзаг хæдзæрттæй ног цæрæнуæттæм ивыны программæ.
Советы уæнгтæ разыйæ цы нысантæй баззадысты, уыдонæй ма иу у аграрон эко-туристон парк «Земля Осетия»-йы дарддæры райрæзты проект. Зындгонд куыд у, афтæмæй ацы проектыл кусы компани «Мастер-Прайм. Березка». Куыстуаты генералон директор Беккуызарты Ларисæйы ныхасмæ гæсгæ, проекты фыццаг къæпхæны объекттæ сты цæттæ: экологон хъæу (йæ хъару у æрвылбон дæр 25 туристы суазæг кæнын), цыхтахсæн цех, æхсæнадон фæлладуадзæн тæлм… Дарддæр æххæстгонд цæуынц хæдзæртты мидæггаг фæлгонцад æмæ парчы фæзуатмæ базилыны куыстытæ.
Советы уæнгтæ æрдзырдтой æндæр инвестицион проекттыл дæр.
Æмбырды кæронбæттæны Сергей Меняйло куыд фæбæрæг кодта, афтæмæй уæлдай бæстон цæстдард хъæуы, республикæ цы инвестицион проектты фарс рахæцынвæнд кæны, уыдоны номхыгъдмæ. Йæ ныхасмæ гæсгæ, Хицауады фыццаградон æххуыс хъуамæ уа, ахадгæ социалон æмæ экономикон нысаниуæг кæмæн ис, уыцы инвестицион проекттæн.
СЛАНТЫ Аслан
