Республикон онкологон диспансеры радон хатт арæзт æрцыд Гом дуæртты бон. Уыцы акцийы фæлгæты фæлтæрдджын онкологтæ æмæ иннæ медицинон кусджыты консультацитæ райстой 700 адæймаджы бæрц.
Уый тыххæй фехъусын кодта РЦИ-Аланийы Æнæниздзинад хъахъхъæнынады министрады пресс-службæ.
Министрады минæвар куыд фæбæрæг кодта, афтæмæй ахæм мадзал арæзт æрцæуы рæстæгæй-рæстæгмæ, йæ сæйрагдæр нысантæ сты онкологон низтæ сæ райдайæн къæпхæныл раиртасын æмæ уыцы карз низы ныхмæ профилактикон куыст.
Акцийæн фадæттæ сарæзтой Онкологон рынчынты æппæтуæрæсеон иугонд «Бирæ цæр!»-ы регионалон хайады уæнгтæ, хæрзаудæн фонд «Хъæбатыртæ»-йы, æнæкоммерцион организаци «Инфосоцпроект» æмæ онкологон диспансеры минæвæрттæ.
Боны дæргъы æххуысхъуаг адæмимæ фембæлдысты, онкологийы къабазы чи кусы, уыцы специалисттæ: гематологтæ, урологтæ, гинекологтæ, химиотерапевттæ, хирургтæ æмæ иннæтæ. Уыимæ, ацы аз акцийы ногдзинад уыд, диспансермæ чи ’рбацыд, уыцы адæмæн, цæгатирыстойнаг специалисттæй уæлдай, консультацитæ бæстæйы раззагдæр специализацигонд медицинон кусæндæтты специалисттæ кæй лæвæрдтой, уый. Уыдоны нымæцы: Гинекологи æмæ перинатологийы национ иртасæн центры, Æппæтуæрæсеон онкологон наукон-иртасæн институты, Мæскуыйы Сыгъдæг Илиайы номхæссæг рынчындон æмæ æндæр медицинон кусæндæтты минæвæрттæ.
Æххуысагур æрбацæуæг адæмæн, консультацитæ райсынæй уæлдай, уыд уæлæмхасæн анализтæ раттыны фадат дæр. Уыимæ, уыцы раиртæстыты бындурыл бирæтæн фæбæлвырддæр кодтой сæ низыхатты къæпхæн æмæ сын бацамыдтой, дарддæр сæ кæцы специалистты цæстдард æмæ цавæр
хостæ хъæуы, уыдæттæ.
Æнæниздзинад хъахъхъæнынады министрады минæвæрттæ хорз аргъ скодтой, акцимæ бар чи дардта, æппæт уыцы организацитæ æмæ иугæндты специалистты архайдæн. Онкологон диспансеры разамынд та зæрдæ бавæрдта, ахæм мадзæлттæ фидæны дæр кæй араздзысты, уымæй.
КАЛМАНТЫ Аслан
